我都有阿媽生架 我做CS就要比你問候全家？

第一，係好好好好好重要嘅嘢，就係顧客不是永遠對的。喂大佬，你自己唔記得交錢，咁好正常梗係要收你Charges 架啦。係你唔記得交喎，明明係你唔啱在先啦，點解仲可以大條道理咁覺得自己一啲問題都冇。好啦，你唔記得交都算啦，大部分Charges我哋都可以幫你豁免咗佢嘅。所以其實你唔使打黎又打又殺咁，你好聲好氣講句，我哋一樣會幫你豁免咗佢。唔該唔好，大大聲咁以為自己啱晒！

第二，三句唔埋就開始話我哋煩（話煩已經好俾面，仲有大把三字真言）。同客Check下個人資料係一定有嘅程序，如果唔係點Make Sure 你啲個人資料安全呀？問多兩句就開始問候我祖宗十八代，大佬，可唔可以俾返少少耐性。你打得黎都知要Check下你是咪本人先可以繼續啦，如果唔係呀，是但一個人都可以打稷攞你啲資料啦！問咁多，都係為你好咋！

第三，我都唔想你等咁耐。我都知你係千辛萬苦終於打到電話入黎，我都明等咁耐好躁。不過，你估我想架？係我cut晒啲電話唔俾你打入黎嘅？老老豆豆，都係公司安非他命架咋，我都唔想你等咁耐，唔想手口不停，尿都冇得屙咁覆電話。所以，唔該唔好下下一打黎就不停掃我話打唔到電話。如果你係要講嘅，不如直接打去投訴部，順便幫我地叫公司請多幾個人。

第四，我咃唔你專屬秘書。無錯無錯，你的確係公司尊貴嘅客人，不過你要知，CS並不是淨係Serve你一個，你唔記得交錢唔好賴我唔提你。有一次（其實都唔只一次），個客打黎嘈話我哋冇佢交錢，話吹到呢。要每個客打去提一次我哋仲得掂嘅，唔該各位大小姐同大少記得提自己交錢，唔好姓賴啦～

第五，我哋好唔得閒，好多Call，唔好打黎問埋啲九唔搭八嘅嘢。明明係銀行電，我唔明點解可以打黎買M記同問路。真心，唔好玩電話囉，日日聽十萬個電話已經好躁，仲要好聲好氣咁話你知你打錯，真心會好躁好躁囉！

講咁多，有人一定一句話「做呢行都預咗啦！」係，都知香港人好難服事，好多要求。不過，其實都係想大家尊重下啫，都係打份工啫～