我住馬鐵沿線 轉5次車去港島返工

我覺得我比住大西北或者將軍澳嘅人更堅，
因為小弟每日都要轉五次車返工放工。

同其他打工仔唔同小弟因為每朝返工都要不停轉車嘅關係，
所以通常都無時間喺車上恰陣，
正所謂「恰一陣成千古恨」吖嘛。

同大家講吓到底小弟係點返工。
首先因為小弟住嘅地方離最近嘅馬鐵站一啲都唔近，
所以每日要先搭一程小巴到馬鐵站，
而每朝嗰條小巴站嘅隊都會排晒長龍，
所以小弟要比行車時間提早15至20分鐘不等出門口。

去到馬鐵站，
因為唔係喺總站上車，
所以每次上到車已經無位坐。
去到大圍站，
車嘅班次永遠都唔夠人龍積聚嘅速度快，

無論啲波板糖人點叫啲人行入車廂中間，
啲人都係一於少理，自己上到車就算，
加上係東鐵線，
唔知點解啲拖喼嘅人如果搵唔到位坐就一定係連人帶喼塞正係車門。
所以每次小弟一定行入車廂中間，
良心其次，
而係車廂中間真係舒適萬分，空間夠我跳返part舞耍個太極。

好喇兩三班車走咗後我終於上到車，
唔夠五分鐘又要準備逼落車。
九龍塘啦嘛。
其實我真係好唔鍾意啲人車未停定就郁嚟郁去想痴實個車門，
明知大部分人都喺度落架啦，
你急乜嘢呢？又逼人要同你HI身HI勢咁，
有啲以為自己好有禮貌嘅會喺度「唔該唔該」，

有時真係忍唔住話：
「你唔該我都無用，我唔該你等車停定再跟住人落唔好未到站就喺度唔該唔該，唔該！」

開車門嘅叮咚聲唔知點解會畀部分人當咗係起跑嘅槍聲，
一開車門就總係有人跑馬咁跑去電梯。

因為小弟每日會喺九龍塘站嘅同一個位上落，
所以留意到一位好特別嘅車站助理嬸嬸，
每日朝早都拎住個大聲公，
但佢唔係背嗰啲小心呀嘅對白，
而係「唔該你哋班人全部落返去！同我全部落返去！」
佢把聲真係好鬼響，
當咗你班人喺鬼門關偷溜出嚟嘅小鬼咁，
佢就負責捉鬼咁鬧返哂你班乘客落去。
初頭覺得佢好鬼煩，
依家亦唔係對佢好有好感，

不過見佢好似幾enjoy咁，
反正都係畀佢煩嗰幾秒姐，
所以後來都無咁在意，
有時佢調咗位仲會有啲掛住佢把聲，好有老媽的感覺。

左轉右轉落去往黃埔嘅月台，
每次都希望今日啲電梯唔好又壞。
同大圍一樣，都係要等兩三班車先有得上的。
唔知有無人同我一樣覺得，
石硤尾上車嘅朋友都識縮骨功，
明明九龍塘啲人都上唔到，
佢哋都會上到車，
成日都係喺門口位嘅我，
又唔會覺得佢哋逼到我架喎！
不過有時真係爆得滯嘅時候，
又會覺得石硤尾嘅朋友好慘，
成日都唔知幾時先上到車。

去到旺角，
對面月台已經積咗一大堆人，

不過比起大圍同九龍塘，
喺旺角上車又好似無咁辛苦。

好喇經過幾個站，
我哋嚟到大佬金鐘喇，
金鐘啲人真係特別鍾意跑落車，
成日都見到剛剛畀人讓座嘅公公婆婆一到金鐘就成個人精神晒，後生咗幾年咁
真係見到都鄧佢哋開心！坐一坐就返老還童！
唔怪得政府成日都叫我哋啲廢青要讓座啦！
可以慳返啲醫療開支吖嘛！

千山萬水，轉咗五程車之後，
小弟終於去到返工個站。
不過仲要克服條奪命長斜路，
先可以去到出閘機度，
嗰度快則五分鐘，慢則十分鐘，
令小弟每日都好感恩自己無腳痛問題，
如果唔係就要好似董伯伯咁專心做廢青喇。

經過一日嘅辛勞，
我又要重覆返以上嘅步驟返屋企，
而呢種生活，
我已經堅持咗差唔多五年，
不過我知身邊嘅五六七十後都係唔會畀個讚我，
所以其實都無乜嘢姐：）
只係比大西北朋友轉多程車、又一樣無哂social life咋嘛：）