差啲整爛塊面 市面20保濕MASK含防腐劑或致敏

夜晚瞓瞓吓已經覺得塊面好痕，第二朝起身，小編簡直崩潰，成塊面紅色一撻撻。小編第一時間請假去睇醫生，醫生話皮膚過敏，足足搞咗成個星期先完全好番呀陰功。

啱啱消委會就有報告出咗，新一期選擇月刊就測試咗40款保濕面膜，結果發現啲面膜無論售價同效果都有好大差別，其中保濕效果最出色嘅好多每塊都只係賣10幾蚊，包括每塊15同14港元嘅utena、 Mandom Barrier Repair等，反而每塊賣100及108港元嘅兩款Shiseido及Lancôme表現屬中下。

17款驗出「甲酯」

另外又發現半數樣本含有可能令人皮膚過敏嘅防腐劑化學成分，當中竟然有17款驗出「甲酯」，不過含量就符合內地規定。

其中肌研同Olay兩款面膜驗出微量鉛，而我的心機、白絲嬌麗同Timeless Truth就含有歐洲禁用嘅防腐劑甲基異噻唑啉酮(MIT)，有可能引致敏感喎，消委會仲話，已經將結果交俾海關跟進。

報告仲話，測試產品保濕功效相差好遠，40款面膜都由最少24個亞洲試用者測試，每塊面膜價錢由3.1至108.3蚊不等，其中36款試用後皮膚水分有所增加，以Mandom Barrier Repair效果最顯著，之後 排位係utena，LEADERS及ettusais；至於用咗之後後皮膚水分只微增甚至無增加，就有美肌之誌，Water360，Timeless Truth及Skinfood。