學齊五招 以後唔怕見到同事會Dead Air
撰文:高清
Look 下 Facebook 幫到你
好多時候look完facebook之後就唔記得自己睇過啲咩，不過想避免Dead Air，就點都記住一兩件新聞或者熱話。因為作為社會一員，點都會對社會嘅事有少少興趣嘅。最好就記住一兩個社會大事，例如政府又出咗咩「垃圾」政策，大家一齊鬧下；另外記多個花邊新聞，八掛新聞都係一個唔錯嘅開場白。但係都要留意返你分享嘅新聞嘅對象，開咗聲人地又接唔落去就真係無謂。
講飲講食
多啲留意身邊發生的事情，例如公司附近開左新餐廳、邊到有平嘅零食買。呢兩個話題仲可以無限伸延，講下鐘意食咩餐，有咩特別好食。講完有咩好食，仲可以講埋有咩「伏」餐廳，食過啲咩難食嘅食物。返工咁辛苦，都要搵食飯啫，講飲講食一定輕鬆冇Dead Air。
做個有心肝好同事
平時多啲留意人地講過嘅說話，記住同事一啲基本資料，例如佢嘅興趣、住邊區等等，咁就可以投其所好，簡單打破Dead Air。例如「你好似住好遠喎？搭車會唔會好麻煩？」，你問一句，之後答你一大輪，你又可以講下自己，咁仲點會有Dead Air 呢？另外，仲可以觀察對方，問一啲為對方度身嘅問題。例如「你對鞋好靚喎，喺邊到買架？」，咁就可以等對方答你。
講笑話
袋定幾個高質嘅笑話，因為「笑」永遠都係消除 Dead Air 嘅最好方法。一個笑話應該可以俾你笑足分鐘，喺適當時候真係可以「救命」。當然，你要之前做定功課，唔好隨口講啲爛Gag，「從前有三隻蝦，哈哈哈」呢啲就好唔講啦。至於，點先叫高質，就要睇下你班同事係唔係一班笑點高嘅人啦！
冷知識講故仔
記住一啲冷知識，例如「小丑同畏高症是兩種大家最常見的恐懼。」、「迴轉壽司嘅由來」，等自己可以講下故仔，唔洗完全Dead Air。開始咗個話題，同事之間大家交流下，對方又會覺得放鬆，更加願意同你傾偈。
好多時都要執生架啦，平日留意多啲身邊嘅野，主動打開話題。其實，Dead Air 都唔係好可怕啫。
延伸閱讀：
【藍田滙景 市區罕有的小店商場】
http://www.edigest.hk/Vip/detail?id=3539
【內地首家米芝蓮廚藝學校明年開幕 創辦人是90後港美少女】
