80後讀唔成書唔知有咩出路 網民：無學歷唯有用勞力｜網民熱話
網民建議樓主可以考慮去外國留學，無心讀書嘅話都可以諗下嘗試踏入youtuber界，又或者近年興起嘅電競。樓主有回應到自己唔係讀書材料，補考會考試過中文E>U，另外亦冇錢出國進修。「YOUTUBER 電競點搵錢我真係唔知..從來都覺得係好TOP個D先可能有小小收入..當5位數..但都唔可以當正職..加上本人完全IT白痴+表達有問題..一事無成仲YOU乜野TUBE」
就樓主嘅背景，學歷唔高，想穩定，唔想中年失業，考政府工係一個唔錯選擇。有人亦建議可以考政府二級工人先，考到後再讀新毅進，讀完後再考其他政府工。二級工人都有其優點，拿公屋特別快。「我眼見依幾年都多左年輕人做二級工人，當然長遠想結婚生子就要考其他政府工。」相同經驗者表示：「 我自己做左9年飲食，見證沙士及金融海嘯，所以立刻讀書進修考政府工。雖然依家份政府工惡做，但最少唔怕中年失業先，又有部門宿捨住。」
除咗政府工外，網民亦推介考個車牌 之後做巴士司機； 以及做地盤、三行等。「雖然辛苦D，污糟D。但時間短，人工高。」
「80後男人，最少今年都成30歲，男人如果冇學歷，根本好難搵到份好工，只能做D體力勞動既工種或保安，基本上可能份份工都好難做得長，建議你學門手藝啦，廚藝，剪頭髮，電腦維修，整電器，地盤(建造業學院)，咩都試下學啦!!!!」
「做尊貴既議員 不需學歷 大把高官俾你問候 薪高糧準」
有自稱係樓主嘅同路人表示，自己後來做咗sales就改變咗我自己，現在叫有小小成就。
有網民勸樓主唔洗太灰，需要嘅係諗下自己有咩興趣，知道自己鐘意什麼，才會起勁地投入。
無論過往是怎樣都好，你的人生，不是100%受制於過往，你的失敗經驗，不能假設你的將來都會失敗下去，所以所有事，都靠你自己去爭取及努力。
每個人都有其在社會中可以發揮的空間，問題在於揾唔揾到最合適嘅空間，同埋當事人接唔接受最合適嘅空間往往都唔係自己一直嚮往、夢寐以求嘅空間。
有網民慨歎香港職場嘅遊戲規則，打關係攀龍附鳯就得，誰大誰惡誰正確，只要揸權果個話得，菲律賓野雞大學又做野唔掂一樣上位。
「 講上進心，我比大部分人都高，博士學歷，結構工程、機電工程、會計、財務、法律、環境科學嘅學位我都有，係本地大學堅考返來，專業資格也一堆，工作獎項也贏很多，結果我無得選擇，現在考了大工牌，做地盤工人。香港職場玩法，100%人事關係，董事對下有親戚朋友介紹，經理對下有親戚朋友介紹，主任對下有親戚朋友介紹，學歷個個可以買，工作表現任揸權的寫，下面有班新人加班死做難做，出事炒佢地就得，勝敗不在於學歷及能力，而在於行業權力及人事背景關係。」
唔少網民都提到應該要將興趣發展為職業，這樣會增加成功機會。路係人行出來的，你做的事，有些可能係無人做過的，所以你要自己發現自己的興趣。
如果唔知自己興趣係咩大可以打開一本興趣班的報名課程簡介，睇自己對咩有興趣。「現在社會open左，連打機都可以成為專業，所以人生要努力去尋找你想過的生活，努力活好去，自然事事都柳暗花明又一村。」
未確定自己的興趣係咩之前，就讀一些自己有興趣的課程，然後自己再檢討自己其實係咪鐘意。 找到有興趣的事，就堅持下去，這樣就會累積到經驗，就會再推動你更加努那及更投入。
尋找的過程可以是漫長而痛苦的。 屋企人未必知你的興趣係咩，所以都很難建議你條路可以點走。如果真的找不到自己喜歡什麼，那你就做好現在你份工，那麼慢慢就會有眉目。
