原居民大呻三聲 元朗係冇牛但就有好貴嘅樓
廣告
由細到大住元朗，都唔覺有咩大問題，因為都係區內解決所有需要，但係到讀大學先開始我的惡夢。大學讀港大，屋企環境唔太好，學費已經要自己做part time賺錢交，無多餘錢畀宿舍費，所以要每日來回港島同新界西。嗰陣地鐵港大站未開，搭完西鐵線轉荃灣線再轉小巴，返工返學時間人又多又逼，好多時都要等多班車，無一個半鐘都返唔到學校。
一 車費貴車程耐
到依家返工情況都係一樣，去邊度都遠，一句話總結交通上嘅不便就係「人生有4分1嘅時間都係用嚟搭車」。
搭車耐都算，仲要愈來愈多水貨客塞爆成個元朗，講起就㷫。搶貴晒啲野，好多舖都變咗藥房。每逄星期六、日，我哋元朗人可以唔洗行街，因為成條街都畀大陸人霸晒嚟分貨入貨。同埋個架B3直通福田口岸嘅巴士，每個週末都有成4、5圈人喺度等車。
二 塞爆水貨客
唔止水貨客塞爆個元朗架，每個週末都有好多其他地區嘅人貢入嚟，貪元朗低消費。每年10月、11月先係災難，我屋企就喺大棠嗰邊嘅山腳位，一到紅葉季節，係無可能上到一架K巴去元朗，只可以行10幾分鐘出去元朗，行足2個月呀！
三 新樓超級貴
呢邊嘅物價樓價都係有升無跌，由十幾年前 Yoho Town 第一期發售價唔過 100萬，到上個月頭開售嘅 Grand Yoho 2 期入場費要 5 百幾萬，樓價暴升5倍幾。以前仲有人因為買唔起市區樓，無奈要買元朗樓，依家連元朗樓都係天價，叫我點樣負擔得起。
到今時今日仲有人問我元朗係咪有牛，仲有一樣，純粹個人意見，X香老婆餅已經無以前咁好食。
不過，我都係好鐘意住喺元朗，最少元朗比市區安靜，夜
晚訓覺唔會有車聲。試過有次貪方便喺個朋友屋企借宿一宵，佢屋企喺油麻地，我嗰晚係完全訓唔著，實在太嘈。自此我就無再係佢度訓，只係留係元朗呢個安樂窩。
