想賣樓、借財仔告前公司 網民：有料嘅大可以轉工｜網民熱話

撰文：SmartED編輯部｜圖片：電視截圖｜資料來源：lihkg

賣樓借財仔都要告前公司

樓主指，自己「五十幾歲，專業人事（士），原本月入四萬幾」，但「被辭職」。又問網民「冇律司（師）推介？問過財仔可以借到十萬八萬打官司。」話自己再唔係「賣左層私樓都有六七百萬，一定夠比律司費」。搞咁多嘢，淨係想告前公司。

網民：係有料嘅大可以轉工

此貼一出，引起網民熱烈回應。大多網民指，如果樓主真係專業人士又「有料」，一定大把公司爭住請，何必同前公司糾纏。勸樓主「不如唔好搞咁多野，休息吓算啦！」又有網民話「咪搞咁多野啦，你都識講有層樓6-7百萬，慢慢用夠過世生活」。

希望公司炒咗「搞事嘅死肥佬」

樓主又補充，原本想到60歲現退休，但公司有個「搞事嘅死肥佬」，令公司逼佢自己辭職。如果前公司可以炒咗佢，比自己入返去做到60歲，就可以放棄告公司。又話一直「仆心仆命為公司做野（嘢），假唔放，星期六日都返工做野（嘢）」，但估唔到得到咁嘅下場，覺得唔甘心。

有網民回應「希望你假膠啦，如果係真，無人要你星期六日做野（嘢），亦無人要你仆心仆命為公司做野（嘢），你工作時間合約上寫得好清楚，係你自己鐘意做義工怪得邊個？」「有人叫你星期六日返？ 自己決定既根本係你奴性重」又勸樓主「告得贏都係為啖氣，輸左隨時陪埋堂費，係咪值得自己考慮下啦」

其他精警留言：

「唔甘心想爭番啖氣，就唔好再死都要入反去，去揾過間公司黎過，做得仲好過之前
，自己開心舒服又唔使煩」「獅子山精神係要返埋星期六日架啦，我地d後生又唔捱得又高分低能點識幫你」