全球股市跌，邊個股市跌得最多?
廣告
今年環球股市多災多難，好多股民蝕到損手爛腳，有啲人放唔切搞到滿手蟹貨。不過早前有報道指，日本一名交易員做淡日經期指，繼而賺大錢。正所謂有人歡喜有人愁，從2015年全球各地股市最高位計起，至上週五(9月18日)收市，究竟邊個地方的指數高低跌幅得最大呢?
自2015年開市之初，A股為全球升幅之冠，上海證券綜合指數由去年底的3,234點，升至5月最高5,178點，升幅達六成。不過A股升得急，跌得亦金。上證綜指由高位起計，跌至8月低位，短短兩個半月跌幅近四成半，為全球主要股市中跌得最多。
跌幅第二大的係俄羅斯，高位計逾35%，無法啦，盧布貶值咁多，油價又跌得咁殘，跌得少過A股算有交待。
而恒指係A股拖累下，由4月27號的最高位28,588點，一路向下至9月8日的20,524點，跌28.21%，最高最低位差距逾8,000點，成為第三大跌幅。
跌得最少的，竟然是印度股市，印度孟買指數由高位只係跌15.68%，比美國的道瓊斯工業平均指數16.24%跌幅仲要少，真係估你唔到。
日、法股市最硬淨
不過，如果用舊年年底的收市價計，結果又唔同。A股因為年初升得多，山大斬埋有柴，所以即時跌到落今年低位，今年計最多都只係跌11.87%，港股反而跌得仲多，最多跌13.05%。
台灣由年初至今年低位計，就跌22.6%，成為跌幅最大的股市，印尼股市都有21.35%跌幅，僅次於台股。
至於今年計，跌幅最少就係日本，只係跌0.2%，法國股市亦跌不足1%，就算以高低位計算，呢兩個股市都跌唔足兩成，算係呢輪跌市中最硬淨的股市。
