做銀行嘅男人嫁得過嗎?

**轉載自 [70後銀行廢中] 分享**

最近看了90後銀行小妹甩轆記的一遍文章「做銀行嘅女仔娶得過」，文章反映出做銀行RM的女生有不少優點。本來想寫一篇關於銀行界RM女生的暗黑面的文章，但又驚會得罪人（頭盔mode，聽說得罪女人會死得好慘）。然而情人節將至，受一眾巴打所託，不如就喺呢度推銷一吓，其實做銀行的男生都真係嫁得過的。Miss請過黎呢邊介紹返：

1）典型Yes Man，Never Say No

如果可以做到三五七年銀行RM依然屹立不倒，除左因為keep住爆數之外，能夠成為老闆膝下頭號Yes Man亦相當重要。對住變態老闆無理嘅要求同好似高官一樣離地嘅sales target都可以say yes，返到屋企對住妳對住外父外母呢啲真正final boss，仲點say no。

2）不斤斤計較

續上，如果可以做到三五七年銀行RM依然屹立不倒，除咗因為keep住爆數同幫變態老闆挽鞋永遠say yes之外，仲要加埋俾同事搶客盤都唔斤斤計較，咁先至受成個office嘅同事（包括老闆）歡迎。有時候隔離房嘅亞姐級senior RM搶左你之前sell落嘅客，如果你肯啞忍，亞姐同老闆仲會請你食雞脾下午茶添（我試過㗎，仲可以俾我加錢upgrade凍檸樂添）！試問喺公司俾人不斷欺凌都唔會同同事斤斤計較嘅男仔，返到屋企又點會同親愛的老婆大人，即係妳，去計較家庭大小二事呢。

3）永不駁咀

一朝早起身做morning briefing輪流講market，跟住keep住call客見客見，放工再上workshop報pipeline玩role play，個咀keep住全日講嘢無停過，夜晚返到屋企已經唔想講嘢。呢個時候無論親愛的老婆大人（係呀，即係妳呀）有咩訓示或者指示，擁有高度奴性的銀行界男生都唔會駁咀。

4）個性率直爽朗

外界經常誤會做銀行嘅人，每日都戴住假面具對客對老闆對同事，我要澄清一吓，其實銀行界朋友有時都好率直爽朗的。我就親身經歷過，曾經到一間大銀行嘅分行，叫一位坐喺門口嘅小妹幫手將一份已經封好公文袋嘅文件，轉交去另一間分行俾另一個同事。從嗰位小妹口罩下露出嘅嘴臉和眼神，都睇得出佢送給我一個「屌！」字 ［銀行小妹心諗：咦？！唔通係我？］。所以各位女生唔駛擔心嫁俾銀行男生之後會成日唔知佢個心裡面諗緊乜，因為其實巴打們都是率性der人。

5）金融才俊的英偉外表［小妹：呢句我講嘅！］

銀行做RM的男生，雖然唔係個個都好似古天樂吳彥祖咁靚仔，但亦唔會好似林雪咁嘅款（大部份都只係好袁偉豪咁上下㗎咋，嘻嘻）。過年過節親戚朋友聚會帶佢出嚟，唔單止見得吓人，仲可以幫親戚唱外幣去旅行，新年唱新紙，攞利是封，免費熱線咨詢銀行服務邊隻股票好等等等等，外父外母有晒face，係咪嫁得過先？

我自己身邊年過30嘅男同事好多都已經結咗婚或準備結婚，證明銀行界男仔去貨真係去得好快。如果依家同緊一個做銀行嘅男仔拍緊拖，Miss妳仲有咩要考慮？唔好諗咁多喇，即刻就去簽名排期註冊啦！（反正排期就好似啲客簽保單咁，簽完名返屋企清醒過後，可以冷靜期lapse單㗎嘛，嘻嘻）

文章授權：
90後銀行小妹甩轆記
（http://www.facebook.com/banker.bellawan/）