你要出租媽？

神聖且威力無窮嘅大媽

大媽好有潛力成為世界級嘅保鏢。佢哋有的是中國好聲音，只要佢哋與你同行，聲威震天，腦細都要忌你三分。 唔止咁，大媽擁有天使嘅面孔，米芝蓮嘅身材，當有人想親切問候你時，一見佢哋咁和藹可親嘅外表，冇晒怒，Yeah!

最重要係佢地面皮幾丈厚，你如果有咩唔敢出面，例如幫襯左美容院簽幾萬銀PACKAGE之後後悔，想攞返錢，搵佢地幫手就岩囉，攞得返錢成數好高。所以話，出租大媽絕對有價有市。至於租價喎，貴為我國當代最具威力物種，應該屬於天價喇，小編都唔識估。如果有上市公司係經營出租大媽生意，相信係一隻爆升潛力十分大的股。

非一般嘅格仔鋪

唔係街邊見到啲格仔鋪呀，係仙人暫住嗰啲長生位呀。唔好驚住，不如計埋條數過你睇先。家陣一個長生位要月租200至300蚊不等，香港每年平均約40,000人過身。嗱，300×40,000=幾多呀?係，政府係有位，不過接近飽和，私營嘅又未必個個負擔到，所以呢門生意真係諗得過。

租一個市區一千呎以下嘅工廠大廈，月租都係4,000蚊左右，遠離煩囂嘅地區就肯定再平多啲。依家劏房劏物乜都劏，Why Not 劏埋工廈，做格仔骨灰龕？

一個一千呎嘅工廈單位，實用面積點都有八百呎掛。每呎都可以變一個格仔，由地下一個疊一個咁疊到上天花板，單位七呎高就疊七個；十呎高就疊夠十個。就當計埋走廊位畀人走動，粗略估計都可以放到2,000至3,000個格位龕位，每個格仔每月收返$300蚊，月入高達90萬元，你都咪話唔和味，門口仲可以賣埋元寶蠟燭香，咁就可以賺到盡喇!

先月儲三千再後捱三十年嘅私樓

樓，係香港土地上「真貴」嘅資源。一般嚟講，普通200呎上車盤最平都要300幾萬元先有交易，想住得好啲，700幾呎中型單位隨時都要過千萬元，真係好抵好想買囉～ 雖然早前沙田第一城有租盤跌穿月租一萬元，啱啱仲話沙田第一城又有2房戶跌穿400萬元，但唔洗驚，技術調整啫，好快可以升返。

所以，唔好比個市擾到敵，應該繼續日做夜做，死慳死抵，唔去日本，或者轉埋行做紮鐵，務求以最快速度上樓。你諗吓，淨係un腳都月入近一萬，係幾咁令人振奮! 依家嘅辛苦都係值得㗎!脫咗個苦海就係神仙喇!加油呀!小編呢一刻都同你一齊捱緊㗎!

睇完上述三項投資，各位精明的投資者，識揀啦﹗