你今日腸咗未?

無天理呀，火腿一直都係糧尾必備佳品；腸仔更加係窮人恩物，你要小編成世都唔再食火腿腸仔煎蛋飯多豉油，我份糧同我本人都接受唔到囉~

雖然有專家話，市民不必太擔心，致唔致癌要睇是否經常食同食幾多，嗱，打工仔雖然窮，但窮都要有骨氣，慳得嚟都要健康！點可以明知腸仔致癌，偏要腸仔飯！？ 有見及此，小編將冇得食腸仔嘅悲憤化為力量，諗咗一份又慳錢又健康嘅餐單。

白切包(MON~TUE)

早前，一對八十後夫婦靠不消遣不購物不吃早餐午餐嘅神乎其技，成功上樓，之後仲可以繼續捱多三十年供樓。除證明成功上車唔一定靠父幹之外，仲教識我哋麵包之重要。

女事主由啱啱開始食兩塊麵包當午餐，到後來只食一塊當午餐，就係咁，佢月儲約10,000元。食飯食到悶悶地，咪食吓包囉，一磅方包8元有8塊，以一日三餐，一餐一塊嚟計，全日都係3元。既然女事主都得，大家冇理由唔得。

粟米六粒飯(WED)

一張打錯字的餐單，估唔到紅左呢道菜式。雖然係好刻苦，但百物騰貴，頂住先啦。

材料：
飯：一碗

粟米﹕六粒

烹調方法：
將米連同六粒栗米煮熟

成本：
飯：一包八公斤米最平約80元，一公斤米大約可以煮出14碗飯，即係一碗飯都係0.7元。
栗米：10元三條，每條栗米目測有100粒栗米以上，平均一粒栗米0.05元，六粒栗米都只係0.3元。
粟米六粒飯：0.7元+0.3元=1元

整個番茄飯(THUR)

要有健康人生同腸道，蔬菜一定不能少。但香港嘅打工仔日理萬機，食飯都未必有時間，仲話煮飯? 放心，之前係網絡紅爆的整個番茄飯，連人猿都識。只要你洗好米，加個番茄，落少少鹽、少少胡椒粉，再按下電飯煲平時煮飯模式即可。

時間關係，當你刷完牙洗埋面換埋衫準備出門口時，個飯已經得咗。計返成本，一個番茄2元，一碗飯0.7元，成個飯成本都只係2.7元。

一飯三餐(FRI)

要有健康人生，一日三餐一定要食足。再加埋慶祝happy friday，係時候可以食好啲、食豪啲。

買一個外賣大盒飯，要多飯嘅，咁大盒都只係23元，分早、午、晚食，除返開每餐都只係7.6元。每次食前叮返熱，諗起都覺得又慳又正！溫馨提示：記得轉玻璃碗叮，唔係又致癌。

百貨公司試食之旅(SAT-SUN)

餐餐淨食包、食飯係悶啲，再加上就嚟聖誕，想食個聖誕大餐都情有可原。食大餐唔洗用錢嘅，趁星期六、日放假，去百貨公司打個白鴿轉就得啦。

百貨公司總有啲試食攤位，要肉有肉，要酒有酒，你講得出都有得試。只要你面皮再加厚啲，同一檔食幾次都仲得。邊食邊行，一定唔會肥，幾有行台灣夜市嘅感覺。再加埋無限輪迴播放嘅聖誕背景音樂，節日氣氛Level Up！