交換禮物五大不敗法則
廣告
又到聖誕，就算有幾毒都好，唔多唔少都要出席Party。其實人唔到唔緊要，最緊要份禮到，唔少人為咗份禮物諗到頭痕，睇落太寒酸的話，唔單止唔洗係個圈到立足，仲隨時畀人放係facebook唱通街，但係禮物買太貴又覺得肉赤。而家記住以下五條不敗法則，去幾多Party都唔洗驚啦！
法則一：團購格價
去專門店買禮物通常要按照原價，好似特別矜貴咁，份禮一定唔差得去邊。其實如果肯花少少時間格下價，睇下團購或者海外代購，話唔定可以搵到唔少折扣，用優惠價買到筍貨！用埋專門店花紙或者紙袋就更加神不知鬼不覺，又大方又慳到錢，不過平時就要儲起啲專門店袋、花紙，唔好丟啦。
法則二：刺探軍情
千其唔好咁傻一早就計劃好買乜，睇下人哋買乜先，再落手都未遲。如果個個都買見得吓人的禮物，就要跟大隊。相反，如果大家都係買零食，或者幾樣平平哋既嘢夾埋一齊，你就識點揀啦！咁就保證自己唔會買錯，又唔會變異類！
法則三：買手製禮物
買禮物好講技巧，周街都搵到的禮物，係人都知價錢，好似某某牌沐浴液或潤手霜，冇得呃。又貴又唔抵都算，仲要冇新意又唔多實用，屋企話唔埋都囤積咗幾打。肯用少少心機，買啲手製禮物，就算買平少少都有心意搭夠，又唔會比較價錢，咁樣仲開心啦！
法則四：避揀XL、XS禮
揀禮物一環絕對不能忽視，記住唔好揀最大份同最細份！你諗下，份禮好細份又輕飄飄，應該都係裝飾或者唔等洗野居多。份禮好大份，九成係信用卡電器贈品或者古怪野(你諗下都知啦，重到咁都肯托過黎，真係咁益大家咩，年尾想清下屋企雜物咋！)，抽到都唔想拎走。所以，記得太大太細都冇好野。
法則五：己所不欲送俾人
如果抽到啲唔等洗、唔食得、唔睇得、唔擺得既野，冇既，除左咀咒下邊鬼個送份禮出嚟，就係開多個Party送返出去。不過你會成為下一個被咀咒既人……
