五大吸金明星寵物 忌廉哥榜上有名

原來好多寵物好有「明星相」，不但止明氣大，網上賺到唔少LIKE，有啲仲做拍電影、出廣告、做代言人，吸金實力唔輸蝕過人。以下就數五位殿堂吸的吸金明星喵、明星汪。

廣告天王 阿Boo

講到國際知名的竉物狗仔，阿Boo認第二，都冇人敢認第一！其招牌Cute Cute樣被選為「全球至Q狗狗」，Facebook專頁已有超過1,750萬名粉絲，果然人氣爆棚。

阿Boo其實係松鼠狗，但冇松鼠狗蓬鬆嘅毛髮，反而剪到個頭成個波波咁，加埋對水汪汪、圓碌碌的眼晴，真係好萌。

阿Boo第一個成名作，就係一家外國知名的女裝品牌，搵佢一齊拍平面廣告，之後仲做埋維珍航空代言「狗」，加上美國公司Gund仲幫阿Boo出毛公仔全球發售，依位竉物界「天王巨星」真巴閉！

奧斯卡狗明星 Uggie

講到拍電影的明星狗狗，一定非佢莫屬，就係積羅素犬Uggie。佢係2012奧斯卡得獎電影《星光夢裏人》扮演男主角Jean Dujardin嘅寵物，之後仲係《情約奇藝坊》演出。

Uggie仲威到拎到狗仔奧斯卡「金頸圈獎」的最佳狗明星殊榮，更成為首隻狗明星舉行「打狗印」儀式。甚至踏足遊戲界，成為日本任天堂首位代言狗。不過，晚年Uggie深受癌病折磨，最終於2015年8月離逝。

電視拍檔 阿笨與阿占

電視界長青，日本的阿笨與阿占肯定當之無愧，每次宮澤先生交的任務，兩位毛孩都會盡力完成，上山下海無難度，每次佢地都有好多搞gag場面，笑點指數極高，氹到班觀眾笑到gap gap聲。

只可惜，鬥牛犬阿占在今年3月8日離世，享年12歲。至於猩猩阿笨，近年已經退出幕前，長居係日本動物園。

貓界Model Maru

日本貓貓Maru出名鍾情捐入紙皮箱玩，所以被人叫做「紙箱貓」，貓奴唔會唔識佢喇掛？

Maru主人不時將佢嘅可愛片上載網絡，每次迅速爆紅。主人仲幫佢出寫真書，依位Model撈埋廣告界，被日本平價服飾品牌UNIQLO邀請拍攝廣告，真犀利。

香港明星代表 忌廉哥

香港嘅代表非尖東忌廉哥莫屬，自從佢幾年前做咗半個月失縱貓口，因而引發大批網友一齊搵貓，事件被傳媒廣泛報道，搞到個個都發狂咁搵佢，好彩最後都搵得返。

自此，忌廉哥就一炮而紅，好多OL姐姐不時會去探佢，順便影相、集郵。之後廣告接踵而來，同Nikon相機、旅遊公司拍過廣告，連譚仔三哥米線都搵埋忌廉哥大做宣傳，仲係書展出書及日曆，真係豬籠入水啦。

不過，近日忌廉哥主人宣布因報紙檔蝕錢，決定最快5月25日結業，見佢嘅日子將會愈來愈少喇。

最有潛力新喵汪獎

小編就認為以下幾位毛孩都好有潛質做國際明星：

野獸Beast

Beast的主人來頭就犀利喇，就係大名鼎鼎的Facebook教主朱克伯格的愛犬。不過，Beast唔係單靠主人名氣出位，自己憑住似「地拖」的造型，亦冧唔少粉絲。小編都FF緊，第時Facebook出廣告會唔會係Beast做代言呢？

伸脷貓Lil Bub

依隻喵星人來自美國印地安那州，唔好以為佢專登伸脷懶可愛，似足科學家愛因斯坦呀，其實佢係天生患有骨質石化症，一直維持小貓時期的體型，所以不良於行，加上冇牙齒令舌頭外露，身世好可憐。不過佢嘅受歡迎程度有增無減，仲會不時陪同主人參加慈善活動！

哥基酒大多

你以為係一個名？其實講緊係三隻哥基狗狗，分別係爸爸「酒酒」、大仔「大大」同細仔「多多」，依個哥基家庭係來自台南玉井。

酒大多成日都幫屋企人睇舖賣芒果乾，Facebook已經有60萬粉絲。主人不時都幫佢地出product架，有月曆、利是封、袋仔、雨傘同埋Line表情貼紙等等，呢啲產品經常好快就被粉絲搶購一空架！

貓貓白吉

人稱「喜劇演員」的白吉貓貓，經常被主人惡搞，白吉嘅主人係插畫師，同白吉影完相後就會幫佢「Ｐ圖」，畫吓眉，改下賣萌表情，簡直可愛到暈，喜感十足。

現時白吉Facebook專頁已有接近13萬人讚好，主人仲幫佢出過幾本寫真書，書入面啲相都好搞鬼架！