五個入名校低成本途徑

方法一：買/租平屋

入校網區係最基本入學條件，豪宅唔容易負擔，不如轉戰平價之選！例如41校網地區包括九龍城和九龍塘等，九龍城約200方呎唐樓月租約7,000元，咁就成功入到校網，過到第一關！

方法二：做校工

如果父或母全職係心儀小學工作，或是該校的幼稚園或中學部工作，但是同一校址，就有20分加，子女入到名校機會十拿九穩！之但係，唔係個個都識教書做到老師，不過唔緊要，可以試下申請做校工，為左仔女入到心儀學校，辛苦啲都冇計啦，仲有10,000元人工袋！

方法三：與名校畢業生結婚

父或母係該校畢業生，可以加10分，入名校機會大增。如果計劃長遠啲，就要係結婚前諗定啦！若果你好想仔女讀指定名校，咁就要同指定名校畢業生結婚，而家好多Facebook好多名校Secret，識到機會都大啲掛 ！最平星期一至五係婚姻註冊處簽字註冊，都係1,050元！不過首先你要有個男/女朋友……

方法四：成為同鄉

好多人都知道，仔女的宗教信仰與學校相同，可以加5分。不過要小朋友咁細個就受洗，好多家長都想佢地大個先決定。不過仲有個方法，就係加入同鄉會，交年費同定期去聚會就得，有啲即使唔係同一籍貫，經會員介紹後都一樣可以加入，會費大約400元。2014年，全港有18間小學隸屬同鄉會，好似上水惠州同鄉會、東莞同鄉會之類，又多個機會啦！

方法五：識校董/教職員加印象分

雖然識到校董同教職員冇分加，但係令佢對你有好印象都唔輸蝕！如果咁啱同佢地係同一間教堂，可以一齊交流下又認識到小朋友，俾啲貼士都好呀！