【FF】來讓我設「人仔」!

最近人民銀行推出一批100元人民幣新鈔，主圖案、尺寸，都冇咩唔同。不過防偽就勁咗，用咗國產最新技術光變數字防偽，即係「100」個數字垂直睇就係合乎國情的土豪金同中國紅，換個角度就有小清新嘅環保綠同都係土豪金。不過小編就覺得新「人仔」唔夠中國特色 ，有見及此，小編諗咗新嘅艾啲牙，希望習大大鍾意<3

永遠紀住習大大

要愛國愛黨，先要愛大大，我講習大大。為咗畀全中國一個向錢看的理由，小編認為可以將習大大放上銀紙，等全世界每洗一分一毫都記起習大大，記起佢令中國成為一個只有好多好多好多(好重要所以講三次)錢嘅強國。

根據英國《經濟學人》雜誌2015年資料顯示，中國的GDP排名全球第二，GDP總值10385.66(十億美元)。不過咁，做人最重要係低調，習大大都一樣，從來都唔打算超越毛主席，佢只係打算成為毛主席首席粉絲，做到毛前習後。

「真‧100」

呢張新「人仔」一開始就出師不利。因為佢實在太新，搞到市面上部分ATM（自動櫃員機）、驗鈔機認佢唔切，顯示出「這是假幣，請注意！」，正一井底之機；仲有部分未見過世面嘅商家因為未見過新「人仔」所以拒收。可見中國世界級嘅複製技術令到人心惶惶，仲搞到官方出醜，真係可恥。

其實，搞咁多做咩，印個「真」字上去就得喇。有個真字就係真，反正無論你整幾多防偽都阻唔到印假銀紙黨嘅創作熱誠，咁不如回歸基本，講個信字喇。

巧威威之「媽!我入到SDR呀!(就快)」

最近國際貨幣基金組織(IMF)總裁拉加德表示，IMF職員認為人民幣已經需滿足納入SDR籃子的貨幣的兩個標準，一是該國出口量位居成員國前列，二是貨幣可自由使用，所以佢贊同將「人仔」納入貨幣籃子，今個月底就會開會討論。
啪啪啪，啪返個掌聲先!中國終於就快應該爭取到人民幣「入籃」喇!好快同歐元、日元、英鎊同美元睇齊喇!如果真係得咗，各國央行對「人仔」需求有機會增加，亦有可能將「人仔」作為儲備。咁值得記念嘅舉動真係好值得表起佢呀!

7777777

唉，今年中國第三季經濟增長唔能夠「保七」呀，係2009年嚟第一次，小編真係好似董伯伯咁，Feeling心悒。雖然有人話中國經濟嘅結構調整愈來愈迫切，又話未來中國經濟增長會放慢。

但冇可能囉，中國喺習大大英明領導及中國式統計數字下，邊有可能保唔到七呀!「保七」既然係全地球人類嘅希望，就梗係值得印上銀紙喇。望住個「7」，用家就會記得保七呢個偉大目標，咁就自然消費得開心又有意義喇。

【題外話】
【有怪莫怪】你哋覺唔覺張新「人仔」同＿通銀行啲愈來愈似……

.