【職場新鮮人系列】強積金入門班

根據理柏公布截至2月底止的強積金(MPF)數據，上月整體虧損為0.95%，以韓國股票基金虧損最大，達到8.4%。以強積金淨資產逾5,600億元，加上截至去年底強積金供款人士303萬人計算，2月份平均每名供款人虧蝕約1,800元。

如果加埋1月份人均虧蝕的9,400元，今年頭兩個月累計人均已蝕11,200元。正所謂是福不是禍，是禍躲不過。既然走唔甩，特別未來會加入社會最底層的年青一族，不如了解多啲，睇吓仲有冇一線生機?

Q1-被強積金選中的人係…..?

似乎係所有。只要你係嘗試自力更生的香港人，都會面臨呢個不幸。除獲豁免人士外，凡年滿18歲至未滿65歲的一般僱員、臨時僱員以及自僱人士，都須參加強積金計劃。

不過，如果你係以下既人士，就有幸走得甩。

Q2-遊戲規則點樣玩?

既然被參加，樂觀啲!試吓了解對方，可能總有一日你會愛上佢。

當你有收入，你就要將薪金的5%扣起供強積金，而僱主就會額外供多5%。呢筆錢一直積存落去，直到65歲先可以扲返。

你既供積金會被投資，而你只可以選擇投資的強積金類別。現時強積金的投資組合可以分為六大類，包括混合資產基金、股票基金、債券基金、貨幣市場基金、保證基金及其他類別。不同類型的投資組合都有不同程度的風險及回報，風險高回報亦會相對較高。

一般而言，如果你係年青/事業起步初期的人士，都會鼓勵選擇風險較高的組合，並且祝福你單車變摩托。但如果你年紀有返咁上下，身體特別心臟唔多好，就可以考慮返風險較低的組合。不過咁，只要任何時候都抱住錢財身外物，呢個遊戲你一定會玩得好開心。

**每次轉投資組合，相關公司可能會向你收取行政費。

Q3-轉工會唔會什麼都沒有了?

正所謂魚唔過塘唔肥，轉工是常識吧?放心，即使工已轉，你依然要繼續供強積金；就算賺好蝕好，呢筆錢都會好似背後靈一樣跟住你，你可以做的只係選擇點處理你同前老闆的過去。

1-可以選擇將強積金結餘保留在原來的強積金計劃
2-將結餘轉到新僱主的強積金計劃
3-將結餘轉到自己選擇的強積金計劃

但留意返，轉移一般需時3至4星期，而且會有一段「投資真空期」(離市風險)，即係在資金轉移期間沒有作出任何投資。

Q4-成日聽到「對沖機制」，到底關唔關我事?

現時唔關你事，但將來都會關你事。強積金對沖機制就係以強積金抵銷長期服務金或遣散費的安排，即係僱主幫你供咗幾多強積金，佢就可以畀少幾多長期服務金或遣散費。

假設公司裁員，你不幸獲老闆選中，你原本可以得到10萬元遣散費，不過僱主幫你供咗咁多年強積金，咁啱又有10萬元，在對沖機制下，僱主有權用呢10萬元當係遣散，即係僱主用你的錢來賠返畀你。唔公平？冇法，遊戲規則係咁。

Q5-「強積金半自由行」係咪指我可以拖喼走人唔使再供?

施主，回頭是岸喇，FF太多對身心都無益。一日強積，終生強積，死心喇。

「強積金半自由行」於2012年11月1日實施，皇恩浩蕩咁等班打工仔一年一次，選擇將你供筆錢以及你所賺到嘅錢，轉移至自選的強積金計劃（新計劃）。

不過咁，打工仔力量有限，位高權重的「腦細」是不受影響。即使僱員選擇自由行，僱主仍須繼續存入原計劃內，而不是打工仔所揀選的新計劃。