【勵志在生性】富二代成功之道

你哋或者會講，人哋啲利市錢隨時等於普通人一年人工，邊度有得比喎。拿拿拿，又講呢啲，大家撫心自問，當你細個收到利市錢即刻大洗特洗時，有冇諗過真係身體力行搞創業先？人哋依家教你積少成多，聚沙成塔呢個道理，咪駁咀先得架。

個世界係佢㗎。(圖片來源﹕何猷君 instagram)

賭王四太兒子何猷君

賭王仔設計嘅apps幫你訂枱之餘，仲會通知你今個星期唔同夜場有咩精彩活動，等你唔會錯過任個一個交朋結友、向上流動嘅機會。而且仲可以話畀朋友知你家陣喺邊度happy緊，低調曬命得嚟又可以避免whatsapp group chat朋友唔畀反應你嘅尷尬情況。

不得不讚嘅係，賭王仔真係好生性，嚟緊佢打算一邊讀書一邊做生意，仲話要讀埋個碩士。邊做生意邊讀書，有生意頭腦之餘又有苦幹同父幹，真係前途一片光明!真係好勵志呀!

「成功需父幹」嘅佢已經獨當一面。(資料圖片)

玩具大王兒子蔡加讚

講起勵志嘅成功故事，真係不得不提「成功需苦幹」代表人物玩具大王蔡志明仔仔蔡加讚。

當年，佢靠住聰明嘅頭腦，早半年畢業，為表孝心更加接受爸爸2,000萬元的林寶堅尼超級跑車作為返港接班禮物。職場上，佢靠住自己努力，先被爸爸委派為集團董事，依家仲做埋副主席! 呢個故事真係好勵志，所以話努力真係有回報!

早前劉鳴煒一言驚醒洛克人，教大家月儲三千就可上樓。(圖片來源﹕劉鳴煒 facebook)

劉鑾雄兒子劉鳴煒

富二代嚟講，最能夠引起大家注意嘅應該仲有劉鳴煒。同好多富二代一樣，佢低調地羸在起跑線上，先後取得倫敦大學國王學院法律學士學位及倫敦政治經濟學院法律碩士學位，之後再下一城，拎埋國王學院取得法律博士學位，決定咗佢人生贏家嘅地位。

返香港之後，佢靠自己努力加入爸爸公司做經理。以驚人毅力配合爸爸黯然引退，成功於十年內接任華人置業(00127)主席、行政總裁及執行董事三項職務。

早前佢提出「月儲三千上樓」言論，觸動唔少人神經，話佢未捱過窮，唔知生活困難，之後佢都知衰補鑊，不斷係facebook專頁post食麥記、三千蚊遊日本等訊息，將自己平民化，睇在佢咁努力份上，畀次機會人啦。

睇完上述CASE，其實富二代除左有父幹，都有苦幹既。至於係先有父幹才可苦幹？定係先苦幹後得到父幹？Well~~~~ ER~~~~~ 小編都係純作報道，不作結論。