「股市核彈」張如城 威力勁過丁蟹？
廣告
「亞洲神童」張如城返來了！闊別樂壇五年後，城城重出江湖，推出全新單曲《紅日之火》，近日在社交網絡洗版，網民認為他獨特的舞姿及歌藝能令香港樂壇「重現生機」；但股民不禁叫苦連天，皆因張如城是「股市核彈」，每次出現都會有股災，三個月內見全年低位。
咪住，講到股災，點少得鼻祖丁蟹。1992年在港劇《大時代》飾演丁蟹的鄭少秋，劇集一推出即遇上股災，一個月內跌兩成。之後每次秋官一出現，股市都例跌。
咁究竟邊個先係真正的「災星」？以下一張圖睇哂！
論次數，秋官贏哂。其實上圖只係抽出幾個跌得特別厲害的年份，篇幅所限之下，還有一些小型跌市未能盡錄。有媒體發現從1992年至2015的23年間，「丁蟹效應」已經應驗了34次。而張如城產量少，只得三次。
不過，不要少看「章魚」威力，雖然佢過往只得三次股災紀錄，但次次都「跌得金、挫得深」，少一次28%，最多一次仲跌53%。跌幅遠遠超過丁蟹，絕對可以話係青出於藍，「股市核彈」絕非浪得虛名。
貼地諗一諗，5月張如城再次復出，有機會令恒指三個月內再見全年低位，有網民推測假設跌三成，恒指會跌穿15,000點。都係講返句︰「信不信由你！」
