10種好朋友要好好珍惜 會陪你一齊癲
廣告
1 好朋友唔會向你講大話
有時講真話會令對方難受，但即使係咁，真正嘅好朋友都唔會選擇向你講大話、對你阿諛奉承，而會將佢真實嘅感覺講出嚟，因為佢有信心你哋之間嘅感情唔會因為呢啲小事而破壞。
2 好朋友放心同佢講秘密
秘密呢家野真係要好小心，一個唔覺意講咗畀個大喇叭知，唔洗24小時全世界都知，到時出醜嘅係自己。不過對住佢，你可以好放心將秘密講佢知，因為你知道佢一定唔會出賣你，對佢百分百信任，佢對你亦都一樣。
3 討厭你討厭的人
好朋友就係你最好嘅戰友、後盾，永遠都係同一條船。所以你討厭任何一個人，佢都會同你一齊討厭嗰個人，咁你哋就可以一齊講佢壞話。
4 好朋友陪你笑過、喊過
你哋之間有特別嘅語言，一個眼神、一個暗號已經可以笑到趴喺地。一齊經歷歡樂，亦一齊經歷悲傷。你畀人恰、佢比人飛，你哋會耐心聽對方吐苦水，見到佢喊，你甚至比佢更傷心，喊埋一份。
5 好朋友對你瞭若指掌
相處耐咗，你哋知道對方鍾意咩style嘅衫、鍾意咩特徵嘅男仔/女仔；唔鍾意食啲咩、唔鍾意點樣嘅人。唔使問對方，都知道佢一定鍾意份禮物。
6 見盡素顏、醜態
係好朋友面前可以放鬆做返自己，係屋企人以外嘅comfort zone，唔需要戴面具、唔需要打扮、甚至唔使戴bra都可以自在地係對方面前大笑大喊。
7 好朋友陪你一齊癲
你扮鬼，佢扮馬，唔會扔低對方，要癲就一齊癲，要喪就一齊喪。為咗追明星而一齊走堂訓街、為咗平機票一齊今日買聽日飛、失戀陪你坐海邊等天光，呢一點一滴就係你哋最美好嘅回憶。
8 Dead Air唔怕尷尬
同唔太熟絡嘅人一齊最怕就係無話題，不過同好朋友一齊，即使大家都唔講野，都唔會覺得尷尬，享受大家無所不談，亦享受大家一齊分享片刻嘅寧靜。
9 好朋友知你有需要即時出現
有事鍾無艷，無事夏迎春，就一定唔係好朋友，因為真正嘅好朋友知道你有需要，一通電話就會即刻出現，陪伴你左右。
10 好朋友不常見面，但一見面就講唔停
就算天角一方、各有各忙，友誼都係永不死嘅！就算幾耐無見，一見面依然搵得返以前無所不談嘅感覺，唔會生疏。
