食少少都好易肥 12款港式食物卡路里排行榜
港式食物卡路里 :01 四粒蝦餃成碗飯
平時吃一碗飯，感覺吃了很多，其實4粒蝦餃的卡路里，已經足足等如一碗白飯。一平碗白飯，大約有220kcal，4粒蝦餃，也有近216kcal。不過白飯的熱量來自碳水化合物；而蝦餃的熱量就來自脂肪，由於外皮用油來搓，一粒已經有半茶匙油，真係天使外表，魔鬼內涵。至於雪糕，食兩球亦等當於食成碗飯，想精明點，可選水果味雪糕：芒果、士多啤梨都是好選擇，脂肪低幾克。
02響鈴+薯條
打邊爐最愛的響鈴，卡路里高到得人驚，5件(未浸湯)已經大約等如兩碗飯。全因腐竹本身已是大豆油，再經油炸，脂肪極高，如果再吸湯汁，簡直不敢想像。另外，一包大薯條的熱量亦很高，加上鹽份高，多食有可能水腫及高血壓。如果食時再加包茄汁，就再加20kcal。
03 珍珠奶茶+牛腩河+西多士+沙嗲牛麵
4種食物，一望就知唔簡單。好似珍珠奶茶，用淡奶沖成，而且珍珠是用番薯粉做，又用糖煮過，高卡是意料中事。至於牛腩河，河粉本身掃過油，牛腩望落再瘦，中間都有肥油。西多士，不用多講，又有花生醬餡，又炸過，聽見到知「肥」，唯有食時不搽牛油，可減100kcal。沙嗲牛肉麵致肥元兇是公仔麵，一個已經450kcal，再加牛肉、加濃稠醬汁，肥﹗
04 午餐肉
堪稱港人至愛罐頭的午餐肉，用肥肉打成。細罐裝未煎前，已經有15茶匙油，吃薄薄兩片，已經是全日脂肪攝取量的1/6，營養師話最多……最多……一星期食一次好了﹗
05 公司三文治
間間茶記的公司三文治都有不同配方，但材料都離不開煙肉、煎蛋、火腿、沙律醬、牛油、芝士……全部高脂，有如脂肪層層疊，肥爆﹗
06 超級至尊大批
Pizza上面的沙樂美腸、火腿、芝士、茄醬固然是致肥原因，但其實用油搓成的批底亦不容忽視。薄批半個，熱量足足有6碗飯，食半個，馬上爆標。
07 街頭小食卡路里 魚蛋原來最低卡
唔食飯，可以用街頭小食代替嗎？多款街頭小食當中，魚蛋原來幾乎最低卡，一串只有76卡，不過鹽份高，一串已含600克鈉，是一天所需的三分一了。吸收過多鈉會水腫，嚴重更會高血壓和腎病； 而茶葉蛋多吃一點也無妨，美國最近已有研究證實，雞蛋黃不會提升人體膽固醇。
08 煎釀三寶+生菜魚肉+碗仔翅
煎釀三寶的蔬果加魚肉，本身超低卡，但即油炸令卡路里升，而萬年油含大量自由基，會加速人體老化和增加患癌風險；生菜魚肉都算健康，不過最好別飲味精湯；碗仔翅如要調味，加胡椒粉和浙醋無妨，麻油則免。
09 牛雜+臭豆腐
牛雜雖然不算高卡到震，但內臟始終膽固醇高；臭豆腐食一件就等於飲了2茶匙油啦！
10 牛油粟米+魚肉燒賣
一杯加了牛油的粟米二百幾卡，走牛油立即變90卡！魚肉燒賣由肥豬肉+豬油+麵粉製成，食幾粒已經肥死你！
11 砵仔糕+雞蛋仔+夾餅
砵仔糕咁齋以為好低卡？甜嘢始終糖份高，無計；雞蛋仔內含牛油、淡奶和砂糖，一式底等於2碗白飯！夾餅仲要On Top加埋花生醬、牛油和砂糖，死未！
12 好恐佈！章丸小丸子
太恐怖！章丸小丸子 食一盒(6粒)已等於4碗白飯，又等如60粒魚蛋！ 元兇就是粉漿、燒汁、沙律醬和落油煎！
貼士: 唔想食飯用什麼取代
可以食意粉、通粉、米粉，或米線代替，熱量同白飯差不多。食粥也可以，一碗半粥大約等如一碗飯。又或者可以食蕃薯、薯仔和粟米都得，一個成年女性拳頭大小相當於1/3碗白飯。
