錯飲運動飲品會致肥

體液相近補水最佳
電解質，睇電視賣廣告成日講，幾乎聽到識背，來來去去都係「補水、解渴、迅速吸收……等等」，但當中好多唔着眼嘅地方我哋經常都忽略，而且好多人將唔正確飲用方式習以為常。其實所謂電解質飲品，即係同人體體液相近嘅液體，所以飲品廠商生產電解質飲品嘅時候，會模仿人體體液為標準。普遍電解質飲品主要成分可分為三大種，包括水分、糖分及其他電解質，如鈉、鉀、鎂及鈣等。由於人體在做運動時流失汗液及水分，而飲用跟體液成分相近嘅電解質飲品，無疑係最有效嘅補充方法。

做任何運動都要飲?
由於運動飲料本來係專為長跑運動員或大量出汗嘅人而設，而作為一個運動量唔夠嘅人，根本冇需要成日飲。因為此舉只會額外增加正餐之外所吸收嘅營養素，如糖及鈉等，飲得多就會有致肥或高血壓出現。舉例在室內做健身，如舉完重肌肉會疲勞，但由於出汗量不及跑步，所以也不適宜飲電解質飲料。咁咩情況先可以飲？大前提當然係做運動，資深營養師黃榮俊（John）指，若以一支約500毫升為例，大約要跑成個鐘頭先可以消耗，所以一般人如果進行低至中度運動（如跑步）不夠一個鐘頭，飲清水已經足夠；而多過一個鐘的中強度運動就可以飲一支。

幾時先啱飲?
其實在運動頭10至15分鐘只需補充200至400毫升水就已經足夠，而電解質飲品在運動完之後飲，期間每20至30分鐘補150至200毫升這個飲用率為最佳。筆者亦聽過有啲健康人士自稱從來做運動只飲水，覺得做完運動飲有糖分嘅嘢係「白做」。其實單單只補充水分，有機會令體內電解質濃度變淡，如果這些糖、鈉質及礦物質含量偏低，影響耐力及體能，更有機會出現抽筋等情況。因為長時間運動會先消耗葡萄糖後再燃燒脂肪，而電解質飲品可立即補充葡萄糖，糖分有效地被轉化為熱量，令身體可以持續做運動，推遲疲勞出現的時間。

一些飲品宣稱低糖，但加了甜味劑，令電解質補糖補能量的作用相對地減少。

含維他命C有益啲?
從市面上嘅大部分電解質飲料，常見嘅款式都以灰色半透明嘅水嘅原味為主，當中包括產地來自中港台，很多牌子亦有推出加入不同口味嘅版本，而就算同牌子的電解質飲品，每款嘅成分隨口味而有機會不一樣，點揀至好？其實本港賣得嘅，基本嘅糖、鈉、脂、熱量及蛋白質等都有齊，有啲亦會印出所含嘅電解質濃度及其他成分，筆者今次就以最常飲用嘅幾款作參考。營養師指，坊間幾個常見牌子電解質飲品濃度都大同小異，影響不算大；購買時不需要刻意去選擇含有維他命C的電解質飲品，因為平時從飲食中吸收已夠，過多反而會肚痛。在選擇時，糖分反而係最值得注意嘅一項。

台灣的電解質飲料中，會出現「滲透壓」這個標籤項目，即糖或鈉濃度愈高，滲透壓亦自然高。

濃度高易解渴?
飲品除咗最重嘅水分外，當中嘅糖轉化為能量亦係佢最特別嘅功效。一般電解質飲品都約有12至13茶匙糖，最佳為每100毫升飲料約佔6克，即6%左右，因為胃部吸收速度及效果在這個濃度表現最佳，同時最快落腸吸收。但太甜又唔得，如果10%或以上嘅，隨時出現肚瀉情況，而且不單是指電解質飲料，果汁或汽水等高糖的「滲透壓」飲品亦唔建議運動中飲用。而在鈉質方面，最佳濃度為每100毫升有40至50毫克。所以換句話講，即係飲品濃度愈高，滲透壓愈高，從而令身體吸收慢，因此愈不容易解渴。

低糖健康啲?
另外，亦需留意一些「低糖」作招徠的 運動飲品 ，可能會出現外加「甜味劑」來取代真糖，從而增加味道。但作為一支以「補充能量」的 運動飲品 ，如果只嘗到甜味，而沒有補充足夠的糖分轉化為能量，似乎也不太合邏輯，如果有飲品連糖分也達不到佔飲品的6%左右的情況之下，消費者要小心選擇。

有時營養師會建議肚瀉的人飲電解質飲料，補充身體因肚瀉而流失的體液，避免出現脫水的情況。

資深營養師黃榮俊

原文：Sunday Kiss

延伸閱讀：
【波蘭型格蝸居 最窄1米不到】
http://www.edigest.hk/Vip/detail?id=3601
【BBC研究：唔想損智力　中年打工仔每週應該返工25個鐘】
http://www.edigest.hk/Vip/detail?id=3569