荔園開幕　5大打卡位+攤位你要知！

荔園，我細細個就聽過呢個名啦，仲去過添呀！中環新荔園今日開幕啦，仲免費入場添！《經一大笑鳥》精選左五大懷舊打卡位，俾你任影唔嬲，快啲跟住我地睇睇啦！

除左五大打卡位，小編仲試玩左五大攤位遊戲！要羸公仔都要有啲橋妙架，不過計我話都係計彩數多！(Well，小編通常試玩中左，但無獎！真金白銀玩就好快玩完，Next！)

難度最高 ***** ，如此類推

1. 逃學威龍 (難度 *)

玩法: 將粉刷掟中人型鐵版指定位置就有獎。
橋妙: 集中全力，谷住道氣去諗個你最嬲既人，掟呀！
試後感: 小編一玩就中左大獎，唔知小編諗緊果個人有冇打乞嚏呢？

2. 我係小忌廉 (難度 **)

玩法: 掟出星星木碟，成功入洞即有獎。
橋妙: 瞄準其中一個洞，每次都掟同一個，摸準感覺機會大啲！
試後感: 小編中左兩次，有細獎。

3. 圈中小露寶 (難度 ***)

玩法: 將圈套入小露寶即有獎。
橋妙: 個圈要套到落底，中間卡住都唔計架。
試後感: 小編次次都落唔到底，搵笨！

4. 經典掟階磚 (難度 ****)

玩法: 拋出代幣落階磚而不擲界即有獎。
橋妙: 等唔好咁多人先玩，啲幣撞撞下都唔知去左邊！
試後感: 小編睇唔到自己個幣去左邊。

5. 荔園對一對 (難度 *****)

玩法: 30秒內摸出兩隻指定相同麻雀就有獎。
橋妙: 等人地玩完，你好記性可以記住啲牌係邊。
試後感: 小編一隻指定既麻雀都甩唔中。