有兄弟姊妹真好 7個超暖心的表現
1 細細個已經唔自私同你分享自己嘅零食、玩具
兄弟姊妹之間無可能個個都有一模一樣嘅玩具嘅，有時阿妹又想玩吓阿哥個機械人、細佬又想搞吓家姐啲Barbie咁，可能都會有啲私心唔想借，但最後因為錫你哋，都係會借畀你摸吓玩吓。對於小朋友嚟講已經係將自己最好嘅寶物同你分享，代表你由細開始，已經係佢重要嘅人。
2 唔會喺爸媽面前篤你背脊
有啲兄弟姊妹唔知點解細細個好鬼黑心咁好鍾意睇住人畀人罵死。如果你係佢重要嘅玩伴，當然唔會想見到你捱罵或者捱打啦，個心明知件事係你曳曳唔啱，都唔會行出嚟頂證你，甚至反過嚟維護你。
3 永遠記得你生日
作為呢個世界血緣上同你最親嘅人，當然唔會唔記得你人生最重要嘅一日，話唔定亦都係佢哋人生一個重要嘅日子。雖然平時同你打交多過食飯，不過一到你生日嘅大日子，就一定會同你好好慶祝。
儘管佢哋無能力買好嘅嘢畀你，但可能會用啲僅有資源整個可能唔食得嘅蛋糕畀你、同你慶祝，就算人大個咗多咗好多嘢做，佢哋都唔會唔記得你生日，喺你同男女朋友或者一大班朋友熱烈慶祝之際，仲會收到佢哋一個祝福嘅電話，叫你玩得開心啲不過要注意安全。
4 睇穿你情緒
由細玩到大，同你經歷咁多風風雨雨，你開心定唔開心，或甚你戚一戚眉，唔洗講出口佢哋都已經感覺得到嘅喜怒哀樂，準到你自己都被嚇親。
5 無條件竉到你上天
佢哋由細到大都會盡自己最力嘅努力令你過你開心正面，小至細細個一張心愛嘅圖案紙，大至大個有經濟能力時偷偷將你好鍾意又唔捨得買嘅嘢買返嚟送畀你，甚至有時仲會接受你一啲無理要求。
6你會感覺到佢哋妒忌你嘅男/女朋友
佢哋覺得你喺佢心目中佔咗一個非常重要嘅地位，當然希望自己喺你心目中都一樣咁重要。不過當佢哋發現你嘅重要名單上多咗一個人，分薄咗自己同你相處嘅時間，當然會心生妒忌。同樣地佢哋嘅心情都係好易畀你睇穿，所以你會feel到佢哋唔多唔少都有啲呷醋。
7 係你永遠嘅避風塘
你開心嗰陣陪你笑得最大聲，你唔開心嘅時候會陪你過、安慰你、攬住你畀安全感你。你覺得無論自己遇到咩事都可以返嚟佢哋身邊畀佢哋保護，而佢哋亦永遠都唔會拒絕。
