最新開幕：澳門巴黎人 7大爆點
採訪：Venus@天才女行社
攝影：Mark
01 | 鐵塔分層收費
約兩個月前直擊咗亮燈儀式，今次終於可以近距離接觸，深入塔身，浪漫到反轉再反轉。
要登塔，門票分7及37樓觀景台兩個價錢。但原來鐵塔入口，不在鐵塔底部，而係先要在酒店主樓5樓行天橋進入，進入前還先要經過真・艾菲爾鐵塔歷史長廊，過了天橋就是7樓觀景台，露天平台景色平平，我當然要攻頂，再搭玻璃升降機，不消30秒就一登塔尖！
呢個塔比巴黎真身細一半， 上到去一樣見到交叉網網同路氹全景，MOP168門票係就係肉痛，但俯瞰光城美景、黃昏紅霞，帶拖友來一定冧爆。如果有得好似艾菲爾咁有得徒步攻頂就更好喇！
遊人可去6樓平台（ 票務處外）望塔，空間不算多但夠影靚角度，盛惠$0 呵呵。
鐵塔37樓觀景台可見酒店主樓、金沙城中心及遠眺氹仔市景。
登塔逐格睇
從5樓鐵塔禮品軒進入會經過歷史長廊，講下真塔有幾威水，沿路上一層即到售票處。
於6樓憑票入閘後可見到扶手電梯，再上就可接駁至鐵塔大橋。
出鐵塔大橋之前可見到巨型銅牆牌，影IG相一流！
遊人可以由7樓搭升降機至37樓觀景台，登頂成功自拍下先！
鐵塔觀景台
開放時間：10 am-10pm
7樓觀景台門票：平日MOP98（小童MOP68）；假日MOP118（小童MOP88）
37樓觀景台門票：平日MOP168（小童MOP138）；假日MOP188（小童MOP158）
備註：逗留時間暫不設時、每晚約7時半至午夜會有閃燈表演
02 | 扣緊浪漫回憶 愛情鎖橋
由酒店主樓通往鐵塔的接駁橋，可以見到一排「愛情鎖」欄杆，原來都是心思位，扮法國愛情鎖橋。大家買返個鎖寫上名字，再同Darling一齊心心雙扣，好肉麻啊！
法國真愛情鎖橋去年因過重要拆鎖，呢度啱啱開就大把位啦！愛鎖每個賣MOP68，鎖頭兩面各有位置寫上你想緊扣人士的芳名。
03 | 北京血鴨欠奉 鐵塔內嘗中菜
預告話 巴黎人 鐵塔內唯一餐廳La Chine，竟然吃中菜，好驚氣氛浪漫幻滅，估唔到試完之後嬲嬲唔落、讚好有餘。
一踏入位於鐵塔6樓的中菜廳，即見到塔身鋼鐵支架，與真身相似度極高。我就嗱嗱聲睇下有無傳聞中的「北京血鴨」……係無嘅，除了大路菜式如蒸燒賣、麻婆豆腐之類，La Chine 大玩創意料理如橙味鴨、蘋果咕嚕肉等等。我就最推介黑松露奶黃球、芝士海膽焗生蠔，極度邪惡！食法國菜最怕又貴又唔飽，La Chine 重點是價錢親民平均消費約MOP250，一邊歎景一邊怒食就最啱喇！
餐廳可以見到鐵塔的支架部分，加上圓形梳化位，視覺豐富。
海膽燒生蠔配芥末蟹子 (MOP128/兩隻)
黑松露芝麻球（MOP58）
由酒店主樓往La Chine的通道亦是靚爆影相位。
04 | 猶如置身凡爾賽 超浮誇打卡位
浪漫之都當然不只鐵塔，酒店內外勁多details浮誇位，我「瓹窿瓹罅」集結影相位大全，誓要餵飽相機！步入大堂即見到25米高拱形天花，中間大噴水池由海神坐鎮，我覺得靚過威尼斯人個金球雕囉。望右即見到check-in大堂；左則是酒店服務大堂，西洋畫作、水晶燈、歐式花地毯等，絕無山寨之感。
1/F 酒店服務大堂
深藍色客戶服務大堂極典雅，以為去了博物館！
1/F CHECK-IN大堂
長方形check-in大堂極具氣派，最多可開20幾個櫃位。
1/F 酒店大堂
大堂天花參照了巴黎第七區榮軍院Les Invalides，拱形天花由12支大里石柱支撐，兩側鋪以法國石灰岩及大理石，金得來唔娘。
5/F 巴黎人宴會廳走廊
要拍出Fair Lady 效果，我就發現5樓展覽室外面的走廊，全用Tiffany Blue 牆紙配亮金色調，姊妹不要錯過。
連接至威尼斯人之通道一出可見展覽室場地，即使走廊裝潢亦不馬虎，唔影好嘥。
05 | 夢幻房間 鐵塔陪瞓
睇完 巴黎人 酒店華麗處處，終於上房喇，一拉開窗簾就可以跟鐵塔Say Hi！酒店有近3,000間客房及套房，共有11種類型，當中三分之一可望正鐵塔景，價錢當然貴點。
我今次率先住「里昂套房」，約770呎，有一房一廳，設計充滿法式摩登之感。一拉開房個窗簾就見到鐵塔，近到猶如喺床邊，可以瞓住歎靚景，晚上更可睇埋閃閃亮燈表演！
價位最親民又見到鐵塔的房「艾菲爾」約350呎，MOP1,598起一晚，而我們入住的「里昂」就是套房系列中最便宜。
我去過其他樓層睇，發現太高唔一定好，雖然比較開揚，但影相角度難就，住中層28、29樓就無敵啊！
洗手間相當闊落，用大量白雲石設計，優雅高級。
啱一家大細的「天倫客房」附設一張上下格床畀小朋友，粉色床加入小梳化、馬卡龍等可愛設計。
天倫客房無真鐵塔靚景，但有房中壁畫都好有Feel。小家具可供小朋友畫畫或休息，每晚MOP1,898起。
06 | 法國文學加持 優雅水世界
位於酒店平台的水世界有驚喜位，先有隻淋水飛船叫「信天翁號」，賣點是熱氣球吊籃，一裝滿水就會向下傾瀉，隨時中招！另外，要挑戰膽量就試試約3層樓高的滑水梯，彎位多又衝又急，管道更是半透明設計，問你怕未？水世界面積唔算大，但收費MOP160可以玩足全日不限時。
飛船「信天翁號」原來好有文學底蘊，以19世紀法國冒險小說家Jules Verne 之作品為藍本，又幾貼題。
住客可免費到水世界旁邊的Art Deco 風泳池游下水，邊浸邊欣賞巴黎鐵塔、紅磨坊風車，如果有個法國水手陪下就好喇！
07 | 開幕日大放煙花 真・火雞姐撐場
酒店鐵定星期二（9月13日）晚上8時18分正式對外開放，嘩有無咁靚啊個時間。開幕仲請到比利時歌手Lara Fabian及真火雞姐莫文蔚做特別嘉賓，鐵塔上空仲會放晒煙花，其他同集團酒店仲會同步直播，一定好震撼！
$1,398起 巴黎人開幕優惠
入住日期：9月14日至明年2月28日
預訂日期：即日至明年2月28日
住宿：巴黎人雙人豪華大床客房（包早餐或午餐兩份、鐵塔觀景台7樓入場券或THRILLER LIVE C區門票兩張、限量版開幕禮物兩份）
交通：由氹仔客運碼頭乘接駁巴士前往酒店約12分鐘
查詢：www.parisianmacao.com
原文：新假期
延伸閱讀：
【2017公眾假期出爐 出遊請假攻略】
http://www.edigest.hk/Vip/detail?id=4602
【學靚女訓車尾慳租金 港人Homeless族狂想曲】
