政府吹雞 鼓勵市民「喜愛夜蒲」
廣告
政府開口要搞夜市，向內地嗰套「地攤經濟」致敬。大陸比較多街邊流動商販，地攤經濟確係跑得出幫到經濟，不過喺香港搵得四大家族嚟支持，地攤經濟就會響商場裏面發生，聽返做嗰行嘅朋友講，呢啲嘢又要牌又要無火煮食，又唔係樣樣食物都做得，其實實行起上嚟都未必係地攤嗰個feel。不過唔緊要，擦鞋都係一種專業，各大發展商回應支持，新地就由馮秀炎代言力撐持政府搞活「夜經濟」。
馮秀炎搞夜市真係有經驗㗎，政府應該向佢取經，不過係失敗經驗囉。2005年觀塘APM開幕，就標榜AM+PM，好多店會開到凌晨兩點。不過做生意嘅人一定會計數，過咗10點都無乜客啦，未有疫情嗰時有八成店舖都10點前已經閂晒，疫情前夜晚嘅人流都唔係特別多。
其實市好就自然有夜市。好似當年老蘭、赤柱、西貢一大班外籍人士「喜愛夜蒲」夜晚飲酒，飲完一間又一間，夜夜笙歌。九八年中環威靈頓街翠華開業， 呢間有「中環照妖鏡」之稱嘅分店，一間鋪殺晒中環成個宵夜時間，甚至直落到早餐時段。班EXPAT走晒，此情此景不再。
