對抗煤氣加價小貼士

正所謂小數怕長計，小編呢啲精打細算嘅市民，梗係會左計右計慳到盡！以下就係對抗煤氣費加價嘅小小小貼士：

1. 沖涼慳氣

炎炎夏日沖涼，可以沖身後先閂水，將番梘搓抹全身後，再開水沖身，唔好畀水長流，咁又可以慳煤氣又慳水～不過小編認為，情況許可下唔開熱水爐，沖凍水涼就更慳！

2. 用電代氣

香港電費相對煤氣費平，用嚟煲水、煲湯，或者用蒸爐、焗爐煮餸，唔單止慳煤氣，加上唔駛用明火，煮食更加安全！如果煲湯用埋真空煲，更加慳埋時間，雖然個煲幾貴，但用多幾次即刻抵返晒！

3. 減氣煮食

如果真係要用煤氣煮食，記得開火前先將煲底、鑊底抹乾，因為冇咗水份，加熱會快啲！另外，開火大細要同個煲底、鑊底直徑一樣咁大，受熱會均勻啲，用氣量都少啲啦！

4. 準時報錶

早前網絡有傳7月要報煤氣錶，如果唔係會將全部讀數撥入8月加價系列，雖然煤氣公司已澄清讀數會按月平均計算，不過報錶的確重要～因為燃料調整費會定期調整，如果咁啱調整費增加時報錶，帳單嘅收費就會增加！

5. 買股對沖

要抗衡煤氣加價仲有辦法，就係買入煤氣股票啦～股份舊年全年派股息0.35元，買一手1,000股，派息350元，每月就可以有多29元，啱啱好抵消加幅！

唔知各位讀者仲有冇方法慳到煤氣？如果有，留個言畀我地分享下啦～