商場也搞鬼 領展鬼屋率先試玩

商場為谷人流，真係無所不用其極！萬聖節就到，領展樂富商場以免費鬼屋作招徠，俾大家勇闖「恐懼心戰室」，近近地又唔洗錢，絕對係應節好選擇！

無膽小編入去行左轉，都嚇到失哂聲，有片為證。鬼屋由多個貨櫃串連而成，全長超過70米，每個關卡都有唔同主題！

(驚嚇指數*****為最高，如此類同，不過小編好細膽，未必準架)

一號貨櫃：荒廢堆填區 (驚嚇指數**)
由垃圾堆積而成，地上仲不時有好多一隻隻爬來爬去，小編唔驚昆蟲，所以唔太怕，但如果你好驚小強，就要小心啲啦。

二號貨櫃：迷魂漩渦 (驚嚇指數*)
入面有好多塊鏡，照住啲射燈，不過有啲頭暈，出到嚟心情放鬆左一半……

三號貨櫃：黑暗森林 (驚嚇指數***)
成屋都係樹葉，不過黑媽媽，好容易俾樹藤纏住，周圍又唔知有冇野彈出嚟。行行下都覺得冇乜野，不過最後就……

四號貨櫃：變態實驗室 (驚嚇指數*****)
變態科學家一入到去就恐嚇你，要你聞出四種唔同味道，啲味都怪怪地，但你最好就答中啦！之後仲有18個櫃要你搵鎖匙，小編伸手入櫃就……即刻彈返出嚟走人！入面既野真係估都估唔到，次次唔同驚嚇，值得一摸！

五號貨櫃：幽閉凶間 (驚嚇指數****)
全屋打紅燈，仲有黑紗簾幕要你一層層撥開先行到。之後就嚇住咁行，每一步都要小心……唔知下一步會有啲咩事……

六號貨櫃：方程迷陣 (驚嚇指數**)
出口鎖起左，有絛數獨題要解到出嚟先搵到密碼，得30秒時間，計數要計快少少啦！

領展樂富廣場「恐懼心戰室」詳情：
開放日期：2015年9月18日至10月31日（逄星期五至日及公眾假期）
開放時間：下午5時至10時
地點：樂富廣場B區露天平台
入場費用：免費／於指定商場或街市消費滿HK＄400元或以上，並出示該消費商場內商戶發出之機印發票正本（由同一商場及街市2至4張由不同商戶發出的機印發票正本，每張發票金額須為HK＄100或以上），即可換領「心慌慌套票」一套，包括「勇字當頭巾」1條、「恐懼心戰特快門票」2張及「慌失失樂園遊戲券」2張。