八達通儲里數 幾耐先換到一張台灣來回機票？

1) 東亞Flyer World MasterCard
東亞Flyer World萬事達卡一向都有最抵用嘅飛行里數兌換率，而且不設最低簽脹額。現時申請的話，有個迎新優惠可享1.5元=1里。呢張卡不論海外定本地簽帳，都可以有5元=1里，即使用八達通自動增值都可以賺取里數。

飛行里數：$5=1里
自動增值金額：$250 / $500

2) Citi Prestige
Citi Prestige是目標客戶係高收入人士，係張尊尚卡。海外消費可以賺多啲，4元=1里，而本地消費就6元=1里。另外，客戶仲可以免費使用多間機場嘅貴賓室。而用八達通自動增值服務，就可以享有6元=1里的優惠。

飛行里數：$6=1里
自動增值金額：$250

3) 渣打亞洲萬里通萬事達卡

可以八達通自動增值同樣可以6元=1里。仲有迎新優惠，簽滿7,500元就送15,000里數。另外，網上簽帳同海外簽帳都可賺取4元=1里。

飛行里數：$6=1里
自動增值金額：$150 / $250 / $500

4）渣打銀聯雙幣白金信用卡

即日開始至12月31日，手持渣打銀聯雙幣白金信用卡可以於上網申請八達通既自動增值服務喇，每7.5元=1里。 雖然好似唔算好抵，不過除了儲里數外，仲可以儲積分。之後每個交易都可以獲得兩倍積分，積分無上限，可以無限儲分。叫埋持有附屬卡的親友申請埋，你都一樣有分儲！

飛行里數：$7.5=1里
自動增值金額：$150 / $250 / $500

5）Citi PremierMiles
攞住Citi PremierMiles嘅你就多著數喇！唔止現金回贈，仲可以賺埋飛行里數。8元=1里，海外簽帳仲低至4元=1里，仲可以免費嘆埋香港國際機場候機室服務。

飛行里數：$8=1里
自動增值金額：$250

元朗去灣仔 齋搭車四年才夠數

淨係望住啲數字好虛嘅，我們嘗試用個生活例子計計數，睇下「嘟」幾耐先可以儲到15,000里數(約一張台灣機票)。

只用八達通返工放工：
假設家住元朗，每天搭港鐵到灣仔返工。
港鐵車資：$27 x 2 = $54

換一張來回台灣機票係15,000飛行里數，以最抵的東亞Flyer World MasterCard $5=1里計，就最少要搭1,388日車先可以儲到。如果365日都要返工，要搭足差唔多四年先可以換到。

如果你只係官塘返中環，一程港鐵車費係14.2元，來回28.4元。儲夠15,000里數就要2,640日，即要七年多。

如果連海都唔洗過，例如由官塘搭到九龍塘，單程八達通車費6.7元，咁要換一張台灣來回機票就一共要搭5,597日，即要15年先得。咁儲法，真係蚊都瞓。

一年內換機票法門

咁係咪用八達通儲飛行里數唔WORK呢？又未必，事關八達通唔只可以搭車，仲可以買野同食飯，如果計埋平日早午晚三餐及其他雜項，儲里數的時間都可以縮短至大概一年。

假設大家跟以下生活習慣消費：

早餐：Coffee Shop 一杯咖啡 + 一件餅 = $34+$25 = $59
上班港鐵車資：$27 (元朗至灣仔)
買杯飲品返工嘆：$20
午餐：$65
零食：$20
晚餐：$85
回家港鐵車資：$27
總數：$303

同樣以5元=1里計算，都要247日，即大約八個月就可以換到一張台灣來回機票。如果儲夠一年，就有22,119分，換張來回曼谷、沖繩機票返來都得。

只係日常返工食下飯，用八達通「嘟」下「嘟」下，唔洗一年就可以換到張機票去旅行，何樂而不為呢？