攞住100萬點夠 退休 用到77歲就乾塘

為保障老年生活，都係靠自己好過。但要準備幾多錢先夠呢？有《經濟一週》讀者係我地facebook專頁post了一條公式，粗略計咗有300萬退休金的話，只係夠洗25年。

但小編就覺得，300萬咁多，都未必人人儲得到。所以小編略略修改，將推休金額定為100萬元，呢個數好似冇咁離地。

假設你65歲開始退休，有100萬元退休金，當每年有5%穩定回報。而每個月生活費就7,500元 ，以香港咁離地既租金睇，7,500元生活費實在唔係多。而呢筆生活費每年有3%通脹。結果係點？

燈燈燈凳，如果平平安安，當中冇遇上投資失利，你又冇乜大病痛令到有額外開支，仲要祈求通脹又唔好突然大升，咁100萬元都只係夠洗12年咋。65歲退休計，原來啲錢只係夠洗到77歲。

近日新聞先話，最新數據香港男女平均壽命長過日本人，成為全世界最長壽的地方，香港男性平均壽命有81.24歲，女性更長達87.32歲。

命雖然長左，但錢又唔夠生活，最尾幾年點算？？？

你又唔洗一額汗既，咁可以年輕時再儲多啲，儲200至300萬退休金，或者再洗少啲，甚至乎做到70歲或75歲先退休都得架(如果仲有人請既話)。

如果你係香港永久居民，就做埋以下5個錦囊，就仲慳多啲。總知記得享盡長者應有既福利，千其唔好嘥！

退休五錦囊

錦囊1: 年滿65至69歲經資產審查，同埋70歲以上免審查，每個月有得拎俗稱高齡津貼的「生果金」共1,290元，當幫補下！

錦囊2: 仲有俗稱「特惠生果金」的長者生活津貼，年滿65歲並通過入息及資產審查，可得2,495元，加埋共3,785元。

錦囊3: 年滿70歲可以用醫療券，總算叫補貼吓。

錦囊4: 年滿65歲用八達通搭巴士、小巴、港鐵都係2元，周圍去都得。

錦囊5: 年滿65歲可以申請長者卡，好多地方都有少少優惠咁啦。

退休冷知識

冷知識1: 打工為退休

一世人流流長，當21歲大學畢業出來工作，65歲退休，原來工作時間只有約44年。而香港男性平均年齡為約80歲，女性為86歲，即係退休後仲要生活多15到21年，呢十幾廿年就要靠積蓄同投資啦！通常有啲人會希望自己唔好咁長命，但呢啲野邊有得預計，都係唔好咁大洗，尤其係女人……

冷知識2: 強積金夠洗6.8年

香港大學民意研究計劃最近發表調查佈告，接近90%受訪者相信強積金「不足以應付退休生活」，而且只係夠洗約6.8年。但40%表示強積金係唯一退休儲備的投資工具……所以話，退休真係唔好奇望強積金。

冷知識3: 控制退休支出

計算退休後生活方法有好多種，不過都係豐儉由人，冇特定標準。而大部分方式都係希望退休後同在職時生活質素相約，有財務策劃師建議退休後的支出係退休前的75%，即係月入10,000元，退休後最多洗7,500元好啦。另外，有專家認為預備的退休金應該是每個月支出的200倍，如果以7,500元計算，咁就要儲定150萬啦。

冷知識4: 供樓另外計

如果有生之年咁好彩買到樓，咁往後人生都係供樓為主，但記住上述計算的退休支出一般唔包供樓。早幾年有銀行推出40年按揭計劃，申請人年齡上限為40歲，物業樓齡要係30年以下。如果你咁好彩40歲買樓又申請到呢個按揭，分分鐘供樓要供到80歲，真係供到死個刻……咁你記得要計埋供樓呢一筆無底深潭。

冷知識5: 最好冇病冇痛

據醫院管理局09至11年醫療服務費數字顯示，65至74歲既開支達1,140萬元，75歲以上更達2,530萬元。當你65歲後，你就有份貢獻架啦。咁除咗醫管局之外，你自己都要畀返啲醫療費，雖然依家住院每日都係100元洗費，但健健康康的話，都係可以慳返唔少既，記住勤做運動身體好﹗