港男買樓後悔落女友名 首期供樓一手包辦 拍拖9年想分手：當時情急出於信任

港男後悔置業落女友名

近日有港男在香港討論區以「層樓寫左女朋友個名」為題發帖，大呻極後悔數年前置業層樓只寫女友名。

事源幾年前朋友向事主介紹了一個「筍盤」，事主有意置業，出於信任，在趕急情況下只是落了女朋友名，但首期、供樓等費用都由事主負責，目前二人同居，女友有時購置日用品。

不過，事主認為女友不思進取，只顧玩樂，並非結婚的理想對象。加上拍拖9年激情盡失，想分手但又擔心女友「賣樓袋錢」，力數對女友的不滿：

• 「之前疫情好多時佢都冇工開，係屋企訓到下午，我就負責搵錢」
• 「佢又連少少都冇付出過，淨係旨意我」
• 「佢成日要活在當下，吃喝玩樂，影靚相放上網，帶朋友上黎show off，如果佢係有心想組織家庭，點解唔可以擺個心出嚟，儲下錢，plan下將來計劃，咁樣就算要分返份都冇問題，我做嘢好忙好大壓力，都係想生活好啲，而家好似養緊個女咁…」
• 「佢又成日轉工，放假就帶班朋友上黎屋企開party，已經聽過有人教過佢，如果有咩事賤賣咗個單位，而家好似被人鏈住個春袋咁」
• 「有去傾過叫佢搵工，儲錢，一齊分擔家務，但係佢好似越嚟越懶散，又同啲friend講到我好有錢，佢根本就係想過公主生活，而唔係ready想成家立室，就算結婚都係我一個人儲錢，我一個出晒，咁我寧願拍拖算」

因此，事主認為女友並非理想老婆，表示「我真係唔想咁樣對住佢一世」。有朋友關心二人何時結婚，事主認為「結婚仲要被攞正牌分身家就慘」，目前「兩頭唔到岸」，遂請教網民如何是好。

網民︰長痛不如短痛

不少網民建議事主「及時止損」，最理想的做法是事主與女友商議對策並達成共識，其次是尋求律師的協助：

• 「你最好有證明所有錢係你出嘅，包括供樓嘅單據、首期嘅單據、銀行戶口嘅支出，搵律師或者仲裁員傾一傾，如果可以同你女朋友協議到就最好，律師費都慳返」
• 「最好大家講清楚囉，你女朋友跟咗你咁耐，分一份都好應該，另外唔啱就唔好再拖，浪費佢啲青春」
• 「唔好供,一拍兩散。財到光棍手，你無可能從女友手上收番。你當日決定用你女友名就定左結局。風險從來存在，而家情況算投資失利，損手離埸。」
• 「即然你對佢已冇晒感情，都唔會娶佢，就唔好再拖。至於層樓，始終佢都係果時同你一齊捱過，好好哋同佢商量，買咗後，最壞打算係一人一半。」
• 「你可以同佢傾傾畀返一筆錢，等佢走啦，如果唔得先至搵律師傾啦」

另一邊廂，有網民批事主絕情：

• 「9年過去咗先至話唔係理想老婆，就算佢點唔好，佢最靚既9年青春都比左你，你又點賠比人？」
• 「睇你應該係渣男， 女友用咗最寶貴嘅青春跟咗你九年，而家食厭咗就想攞返個成本，我支持女方賣咗層樓，一毫子都唔俾返你」

延伸閱讀：打工仔離職後被無理拖糧 追討人工反遭會計部阿姐用5個字「恐嚇」！

延伸閱讀：大劉甘比Po文曬10歲兒子「巨額」利是錢 慷慨捐出多張1000蚊金牛：心甜了！