父母立遺囑防女兒爭產 居屋、積蓄全留兄長 外嫁女喊爆：明明我付出最多！

父母不分遺產予外嫁女

近日，有網民在討論區「親子王國」以「外嫁女冇遺產分正常嗎？」為題發文，指自己一名女友人得知父母打算將遺產全留給兄長，並對該安排感到十分傷心。

「朋友兩兄妹，佢自己有物業，佢話父母立平安紙遺囑將名下居屋、全部現金都分配俾兄長。」

發帖網民表示，女友人自覺付出比兄長更多，但財產分配竟沒有她的一份。

「居屋父母買，兄長未娶，同父母住，水電煤父母交，佢唔會俾家用，間中會俾一千幾百。」

而且父母早早立下遺囑，亦是為了防備女兒爭產，這更令女友人感到痛心。

「佢父母係怕個女爭，先咁早寫平安紙，朋友喊晒口咁話唔知點去再面對佢哋，佢冇諗過要錢，但而家心中有刺，只可以話佢同父母緣淺。」

對此，發帖網民不禁發問「今時今日外嫁女冇遺產分，係咪好正常？」

網民慨嘆：分錢女無份，夾錢女食大！

貼文引來不少網民留言，有網民表示資產屬於父母，他們有權決定如何分配，又表示「家家有本難念的經」，情況難以一概而論。

• 「無話正唔正常，錢係父母嘅，佢地鍾意咁樣安排，無奈。」
• 「家家唔同吧，有朋友結咗婚後，佢父母講明唔使佢再俾家用，但屋企間居屋亦無佢份。」
• 「如果佢啊哥大佢好多年，以前一個人做野支撐頭家，供埋啊妹讀大學，咁佢父母身家俾哂佢都合理啊，至於你話啊妹覺得自己付出多啲，如果係真既，父母就真係幾唔公平。」
• 「好多家仍然係產業歸仔、責任歸女，分錢女無份，夾錢女食大 。」

亦有網民覺得事主父母十分偏心，不少網民分享身邊兒女雙全人士的做法：

• 「我識人都係有一個仔一個女，層樓已經肯定俾阿哥，現金就一人一半，金器就屬於阿女。」
• 「如果老一輩重男輕女都唔出奇，我屋企就講明屋同錢都平均分，我老公嗰邊就所有物業、公司、錢只傳俾仔。」
• 「朋友屋企有3層樓，講明2層畀男，另一層幾個女分。」
• 「如果一直有供養父母，兩老真係好偏心。我6299 雖然係潮州人，一直都係打算所有財產平分俾4子女，係最近99同我老公講想立平安紙，話唔會分俾移英嘅叔仔。」
• 「​​我識一個女仔，後生時和屋企人全副人工供層樓，每個月只有食飯錢，零娛樂，零購物，多年後供斷了，佢媽媽親口講層樓是比哥哥！女仔係冇份！就因為係外嫁女。」
• 「有一日我奶奶私下同我講，叫我以後我哋啲物業同埋車位，唔使分比我個女，俾晒個仔就得㗎啦，女係潑出去嘅水。我真係覺得佢活喺古代。」

延伸閱讀：科技園CEO逗518萬人工玩「婆仔思維」：竟拎過百億現金去做定期｜中環十一少

延伸閱讀：港媽3度獲派「豬頭骨」公屋 憂入住凶宅影響小朋友：焗住要博四派！