「買明廁，才明智」黑廁係咪真係咁差？網民熱議黑廁、明廁優缺點

社會熱話

Mar 17 2021

香港地少人多，近年愈來愈多納米盤出現，而這類樓盤的廁所多改為「黑廁」，即廁所沒有窗戶。日前，有人於討論區發文，比較「黑廁」和「明廁」的優缺點。有網民認為只要做好通風，就能解決「黑廁」的缺點，然而，有人卻憂慮「黑廁」的衛生問題，擔心會有播毒風險。

撰文：經一編輯部｜圖片：Unsplash

樓主：黑廁係咪真係咁差？

日前，有網民於香港討論區以「黑廁係咪真係咁差？」為題發文，想知道是否人人對「黑廁」十分抗拒。他表示，有人認為使用「黑廁」會有衛生問題，但在疫情爆發後，不少人寧願選擇沒有窗口的廁所，減低傳播風險。

「大家買樓會唔會對黑廁好抗拒？有人話黑廁用耐咗總會有陣噏味，係咪真？如果用浴室寶會唔會解決到問題？但有人又話有傳染病嘅時候，寧願廁所無窗口好似仲安全…. 大家點睇？」

帖文一出，引起網民熱議。有網民認為「黑廁」並沒有問題，只要安裝浴室寶、抽氣扇等，就能改善通風問題。

「黑廁都無咩嘢，keep住乾爽就可以。得閒放個殺菌機或者空氣清新機，擺一晚，都好乾淨無霉味。不過真係要自己衛生意識好先得，有無窗都會搞到好臭有異味，如果唔勤力啲自己得閒清潔下廁所！」

「黑廁無問題，不過一定要裝部勁抽氣扇，我反而覺得冬暖夏涼，沖完涼地下都好快抽乾。」
「黑廁恩物：浴室寶。」
「我會揀黑廁，一來有窗唔會開，二來窗多數開井位意義不大，仲要因為厚外墻做實用面積令室內細咗。另外，黑廁吊頂浴室寶會好過窗口式浴室寶，你將吊頂裝窗口條喉又搞唔掂㗎。」
「無窗問題不大，壞抽氣扇就大鑊，明廁都一樣死。」
「黑廁無問題，不過一定要裝部勁抽氣扇。」

又有人認為，不少只要做好個人衛生，保持乾爽，用「黑廁」亦無問題。更有網民坦言，自從疫情爆發，為降低傳播風險，亦不會打開廁所窗，因此「明廁」和「黑廁」並沒有太大分別。

「老實講好多酒店，商場都係黑廁。其實有無味視乎你自己，你「開大」緊係有啲味，去完開門咪得，呢啲味好快散。住嗰度潮濕咪裝抽濕機、浴室寶。我試過外國租屋，嗰度3房1廁，係黑廁，咩都無裝，去完廁所打開門，唔覺有咩問題，無咩味。我諗通常人地講啲味多數係噏味，你處理好潮濕，基本唔會有問題。」

雖然有網民認為「黑廁」並無問題，但有人卻表明一定不會買「黑廁」，認為就算有浴室寶、抽氣扇補救，「黑廁」長期無窗、無陽光，長久而言仍會有衛生問題，更有人直指從「黑廁得到好處的，只有地產商」。

「陽光入唔到都無問題？如果全屋無窗都得？如果得，咁黑廁都得。如果唔得，點解廁所無窗就得？間屋唔使錢咩？我住過有窗，但對住天井暗井都好唔掂，寧願正常啲，但舊都可以接受。」

有網民坦言，即使能夠接受「黑廁」的缺點，買樓的時候若揀有「明廁」的單位，至少能夠有選擇開窗及不開窗的自由。

「明廁有得㨂開窗定唔開窗，同抽氣喉會短啲，但黑厠就冇得㨂。」
「黑廁=無窗=無通風、照明。『無窗的廁所』，由於欠缺自然通風及照明，長時間開抽風機，濕氣、蒸氣及臭氣，亦只能靠一部抽風機抽出，感覺侷促。」
「梗係有窗好過無窗啦！廁所咁潮濕，連公屋單位都會有窗啦！」
「做人最緊要係有得揀。怕開窗咪閂窗開浴室寶囉，鍾意鮮風嘅咪開窗囉，但黑廁就無呢個選擇。」
「我諗買個單位是明廁，總會比黑廁好呢。因為無咩人會介意廁所有窗，但有些人會介意廁所無窗。雖然你唔介意黑廁，但如果你另一半介意，到最後都係好大機會揀明廁。所以，揀明廁應該明智啲！」

無論是選擇「明廁」或者「黑廁」，有網民則認為買樓或租樓的時候應考慮各種因素，廁所只是其中一項，最緊要單位「啱自己心水」。

「其實真係不能單單以明廁、黑廁去睇咁簡單。撇除了樓價之外，都要睇開則/座向是否符合自己心水，斷唔可能因為一個明廁，就要揀一個完全唔合自己心水既長居之地，始終黑廁係絕對可以接受的。但如果站在條件相同的角度上，明廁肯定會較有優勢，至於價錢，畀人感覺上亦會比較企得硬。」

「新樓開黑廁係要賺盡每一個位，但自己都要睇住荷包負擔能力。擾效就真係睇當時環境，不過好似暫時都未有明確證據。其實黑廁係絕對可以接受，只要買家唔介意就無問題。不過你問明廁定黑廁好，都係嗰句，如果有得畀你揀，你會點揀？答案就在其中。」
「香港人其實好悲哀，買過千萬嘅樓而家連廁所都無窗，主人房都無得兩邊落床。」