【也許換水很難】Office換水攻防戰 猶如捉象棋 敵不動我不動？網民：有啲人寧願渴死都唔肯換水
撰文：經一編輯部 ｜ 圖片：Unsplash
換水猶如「捉象棋」
日前，有網友於連登討論區以「Office 換水，就好似捉象棋」為題開post，指遇到要在茶水間換水的情況時，辦公室內的同事都會採取「敵不動我不動」的心態，「邊個忍唔住渴死就要換水」。
「嬸嬸級會覺得係OL級去做，OL級會覺得係男人做。同時，高職級會覺得係中職級做，中職級會覺得係低職級做。」
樓主續指，自己作為身為低職級職員，又係男人，故擔起換水的責任。換完水後，卻發現每位同事都去茶水間斟水。
「半日唔飲水，到我去斟水，發現無水，苦笑一句 『乜你哋咁忍得嘅？』。換完水之後5分鐘，個個排住隊咁斟水。果然，新手捉棋往往就係太衝動。」
樓主的帖文一出，引起不少網民熱議。大部分網民直言樓主的比喻十分貼切。
- 「無錯！Office飲水係一場心理戰，入面好多學問。你今次錯咗識得吸取教訓就得。」
- 「呢個比喻好正！」
換水好難？網民：職場有太多自私嘅人
有網民指，若辦公室內的水機屬「頂置式水機」，要將樽水倒轉才能放落水機，女同事或需男同事協助才能換水，但辦公室若使用抽水式水機，只需將水擺在下方，其實人人都換到水。
樓主回覆其他網友，亦坦言換水不是難題，最不解的是其他同事逃避換水的心態。
「其實難就唔係好難，係睇唔透點解要寧願自己渴死都唔換水、唔叫人幫手。我諗在座好多巴打同絲打都肯主動換，係發現好多香港人都好似好計較自己要去換水咁，等其他人去換。」
有不少網民附和樓主，指不肯換水的行為十分自私，亦不明白為何連換水都要斤斤計較。
- 「換水咪幾個動作，有幾難？」
- 「換水咪換水，又唔會蝕底咗啲咩，點解要搞到咁辛苦？」
- 「好似換支水會冇咗副身家咁。」
- 「換個水10秒啫。」
又有網民指，自己曾試過一個星期內幫手換水2至3次，認為有太多自私的人。
- 「其實唔明點解要咁計較，我係嗰啲自己用到無水，會幫下手換埋水嘅人，但係我知現實真係有好多自私嘅人。因為試過一星期我會幫手換2至3次水。」
網民：太多人「老奉」有人幫手換水
不過有網民解釋自己並非不願意換水，而是發現太多同事將其他人幫手「換水」視作理所當然，感到不公，認為人人都有「換水」的責任。
- 「其實有時唔係唔肯換，我細細粒都會換水，但係發現成日都係自己換，輪流換就最公平。有時唔換，係想迫啲唔肯換嘅人承受惡果，大家一齊唔好飲囉。」
- 「一次半次梗係冇所謂啦，但係好多（同事）都係覺得老奉要人哋幫手。（覺得）呢啲嘢唔係佢做嘅，佢係（淨係）負責飲。次次都唔郁，等你做先嬲。」
又有網友以魚蛋論解釋不肯換水的心態，指部分打工仔認為自己沒有換水的義務。
「魚蛋論囉。大家都係返工，點解我要搬水佢負責飲。唔得，我要佢飲得唔開心，一係大家都唔好飲。心態決定一切，不過有時啲態度老奉，條氣係唔順嘅。」
