高鐵爛尾 是得還是失？

年青人：「先生，攞張傳單睇睇。」
筆者：「咩嚟架？」
年青人：「反對高鐵，要求停工。」
筆者：「吓？！唔係嘛？停工？我強烈支持高鐵工程喎。」
年青人：「咁你就唔啱啦，點可以支持高鐵架？超支咁多！」
筆者：「超支係唔啱，但係都冇理由停工。」
年青人：「唔通無限超支都要支持？」
筆者：「依家唔係無限超支，況且停工都花唔少錢賠償。」
年青人：「仲有一地兩檢，破壞一國兩制。」
筆者：「其實都有方法解決。」
年青人：「總之你支持高鐵就唔啱，你親中，唔聽民意。」
筆者：「乜我唔可以有自己意見咩？@@……」

近日新聞就有報導，政府已經為停工做好準備。首先，高鐵是香港連接大陸各大城市的脈絡，避免香港被邊緣化。

去年年底，筆者與家人到北京玩，親身嘗試搭高鐵，去程搭慢車，停站較多，由深圳北到北京西，花了逾10.5小時。回程搭快車，停站較少，只停各省省會，時間縮短至逾8.5小時，看着行車紀錄，速度大約是每小時僅逾300 公里，仍然有很大的提速空間。看看高鐵網絡，已經貫通大陸各大城市，幾個鐘就到，仲方便過搭飛機。

港零售轉弱 起商場無助經濟

另外，起咗大半先停工，咁大個爛尾地盤，勢成世人笑柄。從高處往下望，整個地盤由九龍站伸延至油麻地，幾乎去到旺角，原本是一個好有氣勢的標誌性建築，依家成為爛尾地盤！

咁大幅地攞嚟做咩呢？有個唔知乜鬼退休工程師話，可以用嚟做地下商場，又話租金唔知幾多十元一呎，經濟效益仲高云云。講真，現時市面已經死死哋，仲搞咁多商場開咁多名店做乜呢？況且，高鐵是帶動人流的集體運輸系統，經濟下行，沒有高鐵，人流少咗，點營運呢？

再者，一地兩檢都唔係咁難處理。筆者明白身邊的朋友，擔心基本法受到挑戰，又唔使諗咁多。筆者認為，只要符合以下幾點，則不存在破壞基本法。

第一，國內海關人員的權力，由香港政府授權，隨時有權收回；第二，只能在指定範圍內執法，離開咗呢個範圍就冇；第三，他們只有權拒絕入境，不能拘捕。舉例，有激進民主派帶同橫額嘗試過關，其實有齊呢幾項條件，香港人唔需要太擔心。

高鐵可帶旺佐敦、油麻地

還有一點，經濟效益可高於成本。不少反對聲音，都質疑高鐵到時係咪有咁多人搭，係咪真係咁易翻到本。其實所謂經濟效益，唔係淨係計來往人數咁簡單，例如會唔會係商務旅客多呢？會唔會帶動經濟活動呢？例如整個佐敦、油麻地都會因此而有翻天覆地的轉變，賣多兩幅靚地，係咪已經可以賺番大半呢？

筆者同意，超支咁多確實過份，不過2月初港鐵股東會都同意了「封頂包底」方案，但大前提係要追加撥款。如果追加唔到，將來高鐵停工後再復工，變咗「包底」係港府，唔係港鐵。既然唔洗「包底」，點解唔通過撥款，盡可能完成佢呢？如此一來幫到長遠經濟發展，二來政府唔花呢筆錢，又唔代表會分番俾市民，何必呢？

除了高鐵之外，最近港珠澳大橋亦有超支新聞。希望唔好再有咁多拖延，令工程有乜阻滯，大橋無論對香港、珠海及澳門都有很大幫助。