香港零售數據差 只因自由行扭曲市場

筆者：「冷靜啲！點差法先？」
朋友：「遊客大跌兩成，零售又跌兩成。」
筆者：「睇清楚旅發局個報告先。」
朋友：「依家周圍都傳話要減薪裁員，死啦！」
筆者：「整體旅客跌14%，內地跌18%，非內地升7%喎。」
朋友：「咁即係點？」
筆者：「唔係香港冇吸引力，只係太依賴大陸囉。」
朋友：「零售貨值又跌兩成喎。」
筆者：「大陸客比較豪爽，少咗佢哋自然少高消費品。」

打貪令大額消費大跌

零售總值跌，是因為自由行扭曲市場。早幾年自由行高峰期，香港經濟增長迅速，大陸豪客到香港狂掃高消費品，幾十萬的名錶、包包，面不改容，賣高消費品的朋友，個個都賺到盤滿砵滿。

今年零售總值急跌，一是因為大陸遊客減少，轉攻日本、韓國購物。二是內地打貪。筆者有朋友在大陸設廠，早幾年不時搵筆者幫手碌卡，買名錶、買鑽飾等，邊戴得咁多？都是用作送禮！近年大陸嚴厲打貪，高消費品銷量自然大跌，試想想，一隻鑽石錶賣幾十萬元，要賣幾多千支啤酒先可以補番條數？

中港矛盾是事實，問題是即使大陸遊客不減，零售總值還是會大跌。出現今天的情況，某程度上是因為早幾年自由行力度太猛，扭曲了市場。就正如過去幾年的細價樓，幾年爆升近倍，回調兩成亦是正常。

面對經濟數據下滑，我們想要甚麼？旅發局提出要做好服務，吸引國內遊客回流。

應積極吸引非國內遊客

首先，針對內地團，很多時候出現問題的內地團，例如零團費、強迫消費、打死遊客事件等，搞手都是內地人，筆者都唔知香港可以做甚麼。再者，針對自由行，隨着經濟下行、打貪，高消費大陸客減少，如果湧來大量水貨客，是否香港人想要的？

何不回到1997年前，積極吸引非國內遊客、減少對國內遊客的依賴？近年經驗告訴我們，過分依賴自由行只是糖衣毒藥，面向世界才是細水長流。

最可怕的是，政府官員、議員，似乎看不到經濟危機。每天打開面書，都會被負面新聞洗版，經濟數據差、樓市大跌、裁員凍薪、被降評級等等，沒有一件好事。

香港經濟真係差得咁緊要？還是傳媒選擇性報導？政府方面，特首、財爺及各位月薪幾十萬元的高官，有看到香港的經濟危機嗎？為甚麼看不到刺激經濟措施呢？

論政客，各黨各派的議員們，除了拉布、搶主席台、宣鬧，為甚麼沒有建設性提案呢？沒有建設性提案都算，還要煽動民眾拖跨高鐵、港珠澳大橋等大型建設，在半死的經濟上再插一刀。

樓市離底不遠

明白再過幾個月就是立法會選舉，建設性提案不會賺到選票，派錢、拉布、激烈的抗爭才有選票。最近還多了一個港獨，香港前途算甚麼？選票、議席才是最重要的，期望九月之後，議員們可以做點有意義的事。

又有朋友問，經濟數據差，係咪代表樓市有排跌呢？看似有直接關係，實際上好難講。

澳門經濟差，連帶樓市都進入黑暗期，一年下跌四成，相反大陸經濟差，一線城市樓價反而炒到飛天，除了經濟氣氛，很多時候還要看政策、資金流向、投資者心態等等，就香港的情況來說，離底不遠矣。

延伸閱讀：
【香港真係需要阿爺救？】
http://www.edigest.hk/Vip/detail?id=1998

【又有劏舖業主控訴】
http://www.edigest.hk/Vip/detail?id=2232

【零售業走下坡 網購樓市也是元兇】

http://www.edigest.hk/Vip/detail?id=1821