長實英國樓盤POWERHOUSE附送孖煙囪？網民亂譯：係咪叫「李氏力場發電機」
長實POWERHOUSE有大煙囪？
長實英國大型豪宅Chelsea Waterfront的最新一期項目POWERHOUSE，提供260個單位，由1至4房不同戶型組成，面積介乎638至1883平方呎。發展商表示，由於近日英鎊下跌，估計可吸引有意在倫敦投資物業或自住的買家留意。
有趣的是，POWERHOUSE前身是逾百年歷史的發電廠，為倫敦市中心代表性建築物之一。經知名建築大師Terry Farrell爵士團隊成功活化，並由室內設計公司全新打造，將現代元素與歷史地標完美結合。
樓盤廣告推出後，果然引起網上熱烈討論，既因為項目屬於長實旗下，讓移英港人份外有親切感，亦由於項目外型保留發電廠原型，兩支大煙囪令網民印象難忘。
網民：誠哥好鍾意發電廠
有網民發現，長實以往有不少香港項目均由工業改建轉型，笑言誠哥鍾情發電廠起樓：「城市花園、海怡半島同 黃埔花園以前都係發電廠／船塢」
- 「兩支大煙囪要嚟做乜？」
- 「係咪李氏力場發動機真身？」
- 「應該係英國版活化工廈。」
- 「誠哥起樓專揀舊式改建，好環保。」
- 「去到英國都見到力場，求香港人心理陰影。」
- 「建築物本身係一個發電站，唔知日後維修費點樣？信風水嘅人可能鍾意？」
- 「煙通係咪駁油煙機？」
- 「人地冬天真係要暖氣。可能係用中央暖水管。煙囪係咪中央排蒸氣？」
- 「去到英國幢樓賣點都係心曠神怡。」
- 「兩條煙囪可以俾聖誕老人跳落黎派禮物。」
POWERHOUSE位處倫敦高尚生活圈
作為倫敦豪華住宅項目，POWERHOUSE提供24小時禮賓服務及地庫車位，豪華住客會所則設有20米游泳池、水療設施、健身房等。
POWERHOUSE坐落的切爾西皇家自治地段是傳統的貴族地段，位處倫敦高尚生活圈，匯集倫敦最頂級購物、娛樂、休憩與文化藝術地標，同時坐擁頂級學府，包括有皇室成員曾入讀的Thomas’s Battersea及Godolphin & Latymer等私校。
根據長實網站介紹，Chelsea Waterfront由世界著名建築師 Terry Farrell 爵士擔綱總設計，項目包括矗立於切爾西河（Chelsea Creek）入口兩幢分別樓高37層及25層的玻璃幕牆住宅大樓、4座鄰近雅緻花園的河畔住宅，以及改建源於1902年的洛茲路發電廠（Lots Road Power Station）。Chelsea Waterfront 附設商店、餐廳及酒吧，屋苑會所亦為住客提供各項健身設施。
