買樓收租是最佳退休保障

老豆：「邊有得傾，政府擺明就係唔想俾。」
茶客：「咁政府又有道理，冇理由有錢都俾嘛。」
老豆：「梗係唔啱啦，就算有錢都應該要俾。」
茶客：「點解呢？有資產審查唔好咩？」
老豆：「有返工嘅都有強積金，有強積金嘅都有幾十萬元資產。」
茶客：「係呀，咁咪過唔到資產審查囉。」
老豆：「咁咪唔啱囉，有返工都過唔到，咁乜嘢人過到呀？」
茶客：「冇返工嗰啲囉！」
老豆：「有返工就冇得俾，冇返工就有得俾，好唔公平！」
茶客：「又係喎，咁早知我都唔返工攞綜援啦！」
筆者：「老豆，今次又講得幾有道理喎。」

衣食住行樣樣都貴，退休確實唔係一件容易事。老豆又真係講得幾有道理，通常後生有返工，有貢獻過社會的，都會供強積金，退休的時候，最少都有一百幾十萬元，超晒額啦。

即係話，年輕時有努力工作的，反而冇退休保障；年輕時沒有努力工作的，甚至是攞綜援的，因為冇收入，冇供強積金，可以順利通過審查，於是個個都有得退休保障，咁似乎太唔公平啦。

退休預算達七位數字

要退休生活無憂，最好的方法都係有樓收租。靠自己賺？靠自己儲？儲幾耐先夠呀？舉例你想退休之後每個月有20,000元，假設你55歲退休，有85歲命，換句話說你要儲起30年的生活費用，每個月20,000元，每年24萬元，30年就是720萬了。

對於一般打工仔來說都是天文數字，仲要諗，萬一自己有90歲點算？唔通臨尾嗰幾年先去排公屋攞綜援咩？

仲有，呢個世界是有通脹的，高鐵都超支，何況係你？大陸、日本、歐洲都印銀紙，頭先計到720萬元，到你退休的時候就唔止720萬元啦，隨時要過千萬元先埋到單，咁點追呀？

如果有樓收租，回報又唔錯的話，根本唔使擔心呢個問題。

首先，租金本身是物價指數之中一項重要的數據，因此是會跟隨物價調整的，可以高，亦可以低。到時如果午餐肉的價格升咗一倍，理論上租金都會升一倍，甚至更多。

其次，層樓是你的，除非層樓冧咗，如果唔係都可以收租，就算200歲都唔使驚。筆者成日同朋友講笑話，就算要死，都記得收埋租先死，哈哈！

三層樓夠哂數

條數就咁計，通常我哋會話，有三層樓就夠了。一間自己住，兩間收租。假設每個單位租到12,000元，兩個單位加起來就有20,000多元了。因為本身有自住樓的關係，唔使交租，慳慳地應該夠洗。

趁自己年輕，工作能力強，盡早認識房地產，盡早搵個好幾會上車，然後再等機會，買多兩個單收租，俾咗首期後，供樓的重任就交俾租客，到你退休的時候，應該已經供甩。

所以，很多比較年長的同學，能夠以平常心看升跌。今時今日，政府咁多辣招，要買幾層樓已經冇以前咁易，賣咗層樓未必買得番，錢，要嚟做乜？隨時都會洗晒，又話者俾人用電話呃鬼埋，最緊要係個個月有租收，真真正正享受退休生活！所以他們的樓都是非賣品，跌？想鋤？第日退休你養佢咩？