誠哥大手沽半山豪宅等於睇淡？諗返2017年佢402億賣中環中心先啦！
一般人的想法是，買樓是睇好；賣樓就是睇淡。少年，你太年輕了！
賣樓不一定睇淡後市，最重要是下一步做甚麼。就正如筆者與不少學員，現在都有放盤，看淡嗎？當然不是啦。只是部分持貨已過額外印花稅（SSD），鎖定利潤換貨而已。
當然，亦不能排除誠哥是睇淡後市，他的眼光一向神準。
他近年最為人津津樂道的，要數2017年以402億元沽售中環中心大部分業權，其後寫字樓市場也經歷了一次跌浪。今次是否看淡呢？就要看套現之後他有甚麼大動作了。
如果他轉戰海外而撤資，那是睇淡。不過睇誠哥最近沽貨的動作，其實英國物業都沽不少，又未見巿場話誠哥睇淡英國。如果轉而在香港買地，那是換貨，尋找回報更高的投資機會而已。
又有人說，平賣，比之前平了不少。
根據報章報道，今次這宗成交估計獲得收益約63億元，即是這批貨的成本約145億元，利潤超過43%。
那是甚麼概念？就等如閣下買了一個500萬元的單位，幾年後，有人用715萬元跟你買，讀者賣不賣？
一般地產發展項目的合理利潤是30%，今次賣出價雖然比之前便宜，但利潤仍然遠比標準合理利潤高。
很多人說誠哥劈價睇淡後巿，到底便宜了多少？
話說這個項目之前賣了33伙，平均呎價由69,000元至特色單位天池屋13.9萬元都有，有專家評估，今次賣出價約便宜了三成。
首先，現在樓市受加息影響，全港樓價都下跌，賣價比之前低是肯定；再加上今次是152個單位加242個車位的大手成交，怎可能跟買一個單位相比呢？2億元與208億元相差逾百倍。
投資非要賺到盡
又有人說，遲點賣價錢或更高嘛，是誠哥肯定睇淡啦。
在一般人眼中，投資就是要賺到盡，沽貨要最高位；買貨要最低位，可惜貪字得個貧，很多人就是因為想賺盡，總是觀望，總是等等等，到樓價轉勢才來後悔，甚至連樓都買不到。
記住，無得賺盡。之前筆者試過一次，有一個單位，在2015年的時候放盤，因為想賺盡，錯過了高位，後來樓市下跌，該盤放租多兩年才賣，最後賣多幾十萬元。
只要計啱數，高於合理利潤就可以了，把握時機，比單次賺盡賺得更多。
不要用自己有限的思維，去量度高手無限的可能；就算是，都應該全面些、客觀些。
例如今次這單deal，誠哥賣給了新加坡的基金，市場就單純說誠哥睇淡後市，樓市無得救。為何不說說新加坡基金睇好後市，大舉掃貨呢？又不睇下誠哥之後會不會掃地皮呢？這就是不夠客觀理智的分析，便會錯過很多機會。
