職業會消失 買資產保值最實際

筆者： 「做咩事咁感慨呢？」
朋友： 「啱啱睇《經濟一週》篇文章，有感而發啫。」
筆者： 「邊篇文章咁有啟發性？」
朋友： 「嗰篇《未來十年即將消失的職業》囉，有我嗰行！」
筆者： 「其實仲有好多行業都開始式微。」
朋友： 「入行廿年，自問都好勤力，但係咁又點？」
筆者： 「一個人嘅力量，又點能夠同潮流抗衡呢？」
朋友： 「所以做人一定要有危機意識。」
筆者： 「要不斷學習，隨時做好轉行嘅準備。」
朋友： 「仲要趁住有能力嘅時候，買多啲資產。」
筆者： 「有評論話，好多人靠資產發達，好唔公平。」

朋友： 「咁點先算公平呢？」
筆者： 「例如…靠知識、技能、創意等發達先公平。」
朋友： 「講就易，好似我當年入行咁，食正條水，只要肯拼肯搏，要搵錢、要上位，唔算難，頭幾年我都幾風光。而家呢？市場唔興啦，行家執得就執，講真，有咩知識、技能可以食幾十年？唔為自己打算吓，邊個養你先？」

朋友從事貿易工作，工作性質算是文中提到的「經紀人、中介人」，廿年前剛剛畢業，剛剛開始有互聯網，資訊極不發達，外國入口商就靠他們到大陸物色工廠、監控品質、訂貨、出貨……從中賺取差價，朋友非常拼搏，中港歐美周圍飛，賺很多錢。

知識、創意、技能可被取代

後來朋友更自己創辦貿易公司，高峰期位於九龍東的Office面積兩千幾呎，十幾個員工，風光一時。近年公司生意大不如前，年年蝕錢，一來歐美國家經濟差，訂單少，二來資訊太發達，莫說外國入口商，就連小市民買件衫、買個包包，都可以淘寶直接搵廠家，朋友的公司愈做愈縮，只餘下幾個員工，幸好Office是當年買回來的，已分間大半租給別人，自己留着幾百呎，做些熟客而已。

筆者絕對支持應該發揮知識、技能、創意去賺錢，為社會創造更高價值，可惜現實世界很殘酷，市場變化快到你唔信，今天引以為傲的知識、技能、創意，很快就會被取代，慢則十年八載，快則一兩年！打工還好，可以捱多幾年，創業的風險就更高。

先講打工，例如筆者有一位朋友，在著名金行工作，早幾年自由行高峰期閒閒地月入五、六萬元，近年幾乎個個月唔到數，硬掘萬多元底薪，去年他工作的分店更宣佈結業。

又有不少傳媒界的舊同事，都已經轉了行，例如有位從事後期剪接、特別效果的朋友，以前用Panel玩到出神入化，「秘撈」接到手軟，近年被電腦取代，技術跟不上被淘汰了。

再講做生意，例如之前搞密室逃脫生意的朋友，最初極速爆紅，賺很多錢，連續開了幾間分店，一兩年間，潮流速退，公司轉盈為虧，分店陸續結業，聽說還因此欠債。

趁風光儲資產

再說一遍，筆者絕對支持應該發揮知識、技能、創意去賺錢，只是花無百日紅，風光的時候，應該把握機會，動用部份資金購買資產，只要是正正常常的一個住宅單位，或是工商舖物業，總會有人租，總會有價值。

如果你的知識、技能、創意可以不斷提升，不斷為你創造財富，可喜可賀，然而很多時候，知識、技能、創意都有被取代的一天，到時誰來支持你？世界上的確有很多人靠擁有資產而發達，很多人覺得這很邪惡。然而細心想想，很多時候，只有資產才能夠將今天的成果延續下去，保障你的將來。