申請公屋要留意 當局擬調高入息限額2.6%
香港地月入中位數大約是15k左右，而現時公屋入息限額以一人單位為例，是11250元，簡單來說，正常的全職工作也很大機會超額！
圖：房屋署
房署建議調高2018至2019年度申請公屋的入息和資產限額，平均上升2.6%和1.6%
運輸及房屋局提交立法會的文件表示，擬提升公屋入息和資產限額，4人家庭為入息限額由現時的27050元增至27920元，資產限額由506000元增至514000元。一人家庭入息限額由11250元增至11540元，資產限額由245000元增至249000元。
有間公屋 等如賺咗幾百萬？
即使通過上述建議，上限提升後依然容易超額。但香港地一樓難求，相信只會鼓勵更多基層市民降低收入要求或傾向尋找現金支付薪酬的工作，只求排得一公屋！畢竟排到公屋就有如賺了數百萬。
文：1% Anthony
朋友: 「發達啦!發達啦!」
筆者: 「咩事咁開心?中咗六合彩?」
朋友: 「唔係呀!我終於排到公屋啦!」
筆者: 「恭喜晒!咁但係都未致於用發達嚟形容吓話…」
朋友: 「排到公屋,等如賺到幾百萬!仲唔係發達?」
筆者: 「係?條數點計呢?」
朋友: 「咁你都唔識計架?」
筆者: 「願聞其詳~~」
朋友: 「我而家租嗰個私樓單位,每個月要1.2萬,公屋租金只係3千,即係話每個月慳9千,1年就慳近11萬,假設我仲有50年命,合共就慳到550萬,仲未計私樓嘅租金升幅會快過公屋,你話排到公屋係咪等如賺咗幾百萬吖 。」
筆者:「都唔係冇道理,不過最多只係慳幾百萬,唔係賺幾百萬。」
點會捨得搬走
從自住的角度看,真係唔願走!
公屋輪候人龍愈來愈長,其中一個原因是公屋愈來愈抵住。
居住嘛…不是買,就是租,政府亂出辣招,令到居住私樓成本愈來愈高。先講買,私樓的樓價不斷創新高,不但年青人上車愈來愈難,就算是已經買樓的小家庭,辣招之下,樓價愈高,按揭成數愈低,想換樓也不容易。
看看最近市場推出的新樓盤,三房單位動輒要1,200萬以上,按正常按揭方法,只能做5成按揭,首期就要600萬以上,即是一個中產家庭亦不容儲得到,即使之前買落的細單位升值,也不容易達標。
再講租,其實就算買不起,只要租金平,一樣可以解決居住問題。
然而政府去年年底推出第二套房15%印花稅,錯上加錯!市場的租盤急速減少,租金亦不斷上升,住私樓…成本愈來愈高,條件愈來愈差。相反公屋愈起愈靚,租金又平,相比之下,公屋愈來愈抵住,點捨得搬?
然而從財富角度看,等公屋冇着數喎!
先講輪候公屋,已經需要等很長時間,雖說平均時間需要5.5年,但很多時候需要更長時間,身邊不少朋友在輪候期間,都不敢全力發展事業,例如唔願意搵長工,長期撈散,又例如不會全力拼搏上游等,虛耗青春。
到成功申請公屋,在新的富戶政策下,無論是資產超標,還是擁有私樓,都要交還公屋單位,事業上自然亦會勒住勒住,更加唔敢買樓。
錯過致富機會
然而他們沒想到…自己錯過了致富機會。
做?唔做?…
無論是職場打拼,還是創業創富,做與唔做之間,很多時候只是一念之差,心裡要拼,就會咬緊牙關,心裡有保留,要考慮到自己間公屋,沒必要做,就唔做,事業又怎會有突破?
搏?唔搏?…
買樓是很多香港人的致富階梯,由一個細單位開始,然後樓換樓,然後一變二、二變四…今天不少銀髮族,一擲數百萬,幫自己的子女置業,面不改容,財富從那裏累積而來?
是得還是失
如果為了公屋,事業上唔敢拼,買樓又唔敢搏,是得還是失呢?
是的,租公屋每個月可以節省近萬元,每年就是十多萬,幾十年計就是幾百萬,然而最多只能說是「慳」幾百萬,而不是「賺」幾百萬,真真正正可以賺錢的,是你的資產。
過去十多年,樓價翻了好幾翻,如果像戰友們一樣,把握機會,發揮槓桿,一間變幾間,再翻幾翻,莫說幾百萬,千萬也資產也不難,何必為了等候公屋而放棄機會?
作者為1%投資培訓中心課程總監，教授物業投資、上車及裝修等課程。暢銷書《上車又住又賺》及《樓轉命運》作者，網誌《第一桶金》總瀏覽逾300萬人次，並曾擔任TVB《有樓萬事足》顧問。
Fan Page《第一桶金》： www.facebook.com/anthony.wealth
延伸閱讀:
新居屋熱爆 翠領峰翠鳴臺優劣大解構
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
