煥然壹居真係抵買？

意想不到，近半人舉手，反應非常熱烈！
聽眾甲：「抵呀！市價八折。」
聽眾乙：「正呀！月薪60,000元單身都可以抽。」
聽眾丙：「靚呀！環境靚，聽講有180度海景。」
聽眾丁：「筍呀！嚟緊有港鐵站，交通方便，升值潛力高。」
筆者問：「咁多優點？請問邊位去附近睇過呀？」
全場鴉雀無聲。奇怪！未落區睇過點知抵、正、靚、筍？

抵呀！市價八折

點解市價八折會係抵呢？

第一，講折扣，八折唔係送架，將來賣樓要補地價，情況就好似居屋一樣，唔可以自由買賣，唔可以出租，唔可以加按，之前房協五個新居屋項目，市價七折都滯銷。

如果純粹貪折扣，想平啲買個單位自住，點解七折大家會覺得貴，八折反而會覺得抵呢？

第二，當日居屋開價，以荃灣的尚翠苑為例，以市價9,000多元評估，以6,000多元開售，睇番當時隔離左右的半新屋苑，荃灣工廠區三寶，呎價賣到12,000元，立坊細單位因為樓價低於400萬，呎價炒到15,000元以上，尚翠苑估值明顯偏低。

今天煥然壹居呎價11,000至12,000元，折算市價就是13,800至15,000元，看看附近的指標屋苑，傲雲峰、翔龍灣、譽港灣等，呎價大約介乎於13,000至16,000元，邊有平到呢？

第三，買居屋有房協做擔保，借錢相對比較容易，筆者有家人買了綠悠雅苑，審批會比較寬鬆，而且仲免按揭保險費，慳番十幾萬元，接近樓價的5%。至於煥然壹居就沒有房協做擔保，借按揭更難。

正呀！月薪60,000元單身都可以抽

點解月薪60,000元單身可以抽就係正呢？仲接受家庭成員分開入票，舉例一個家庭，四個成員每人搵60,000元，合共24萬，可以分開入四張票，水分仲勁過新樓。

筆者諗極都諗唔明，如果價錢真係平，點解入息限額要俾到月薪60,000元咁高呢？點解資產限額去到300萬元咁高呢？點解一個家庭可以入幾飛咁鬆呢？係咪驚賣唔出呢？

靚呀！環境靚，聽講有180度海景

有冇去現場睇過先？係咪真係有180度海景先？

無疑今天去到現場，確實有海景，問題係睇番之前賣地同埋政府的規劃，周圍都會起樓，入伙後仲有幾多單位可以享受海景呢？

筍呀！嚟緊有港鐵站，交通方便，升值潛力高

將來會有啟德站，係咪代表升值潛力高呢？

首先，講通車時間，由於挖到古井，通車時間一拖再拖，估計應該都要到2020年先通車，仲要等幾多年？

其次，係咪一定有港鐵站就升值潛力高呢？大家有到過現場嗎？看見周邊有甚麼發展？大家飲過鉛水未？

煥然壹居旁邊正正就是啟晴邨、德朗邨。筆者有朋友住在這裡，曾經好幾次開車送她回家，事實上環境甚為屋邨，將來要賣好價錢似乎有困難，係咪真係升值潛力高呢？