港府又再製造樓市炸彈 公屋富戶勢搶高居屋價格　

筆者：「咩事咁急？」
朋友：「佢要俾人攆走啦！」
筆者：「佢住緊公屋un un腳，點會俾業主攆走？」
朋友：「就係俾政府攆走囉，你未睇呢單新聞咩？」
筆者：「入息超額、資產超額、有私樓…是但一樣都要搬走？」
朋友：「係呀！以前就話可以交富戶租金，依家直頭要走！」
筆者：「阿強買咗私樓，咁咪要賣樓？」
朋友：「未夠三年，要俾SSD，想賣都賣唔到。」
筆者：「咁唯有買居屋。」
朋友：「佢哋仲邊有錢？」
筆者：「咁咪實聽俾政府攆走？」
朋友：「仲有辦法嘅，公屋戶主係佢老婆，離婚咪得囉。」
筆者：「嘩！玩到咁大？」

朋友：「咁都好過俾政府攆走。」
筆者：「咁打埋俾阿玲啦！」
朋友：「又關阿玲咩事呀？」
筆者：「叫佢層居屋唔好放住呀！應該仲有得升~~」

今個星期大事件一浪接一浪。CY梁振英突然宣布不參選特首，對樓市應該是好消息。所謂好消息，不是指樓價會升，而是更健康發展。

政策愈推樓價愈升

多年來CY藥石亂投，嚴重扭曲市場，最新一招，將買入第二套房的印花稅，劃一為15%，不但沒有把樓價壓下來，今個星期中原指數繼續上升，收報144.91。筆者早已指出，新「辣招」下，賣咗買唔番，投資者會更惜售，樓價會被挾升！

反效果同時，新招亦扼殺了小市民買樓收租，安享晚年的機會，在資產荒的年代，唔知幾多市民會胡亂投資，炒妖股、炒車位、炒劏舖，輸光血汗錢，潦倒終老。

臨別秋波，留下的炸彈一個接一個。繼新「辣招」之後，突然又推出新的公屋富戶政策，表面上是一件好事，可以迫使更多富戶搬離公屋單位，縮短公屋輪候冊的等候時間，令更多真正有需要的人受惠。然而實際上，又會出現甚麼情況呢？

相信會有不少富戶，以綠表購買居屋。由綠悠雅苑開始，到尚翠苑等一批居屋，到綠怡雅苑等一批居屋，綠表申請比例都非常低，直至最近綠置居推出，以更高的折扣6折定價，才稍為吸引到綠表買家。

逼使富戶購買綠表居屋

正如公屋朋友說：「我依家住緊嗰間公屋，租金才兩千蚊一個月，住成世都願啦，點解無端端要買居屋，個個月供成萬蚊先？」即使收入、資產超額，亦情願交雙倍租金，也不願意做樓奴。

新政策下富戶冇得留低，如果富戶已經有私樓，唔想浪費手上的公屋，最直接的方法就是用綠表資格，購買居屋。

抽到新居屋固然好，如果抽唔到，就唯有到二手市場，購買未補地價的居屋或公屋。之前白居二政策推出，已經將未補地價的居屋價格炒高，相信今次新政策下，二手居屋會更搶手。

以往經常聽見前輩們說，千萬不要買居屋，因為居屋又要補地價，又不能出租，升值能力又低，投資價值低。今時今日，形勢不同了，千萬別低估綠表買家的購買力，新富戶政策下，居屋市場或會更火熱，誰說居屋沒有投資價值？

至於未買私樓的富戶，相信今次政策會打消他們買私樓的念頭。