減息新聞冇人講

朋友：「平又點？經濟又差，又加息潮，邊敢買呀？」
筆者：「加息？啱啱先減息。」
朋友：「咩減息呀？美國明明加0.25厘。」
筆者：「香港銀行冇跟，仲減咗按揭利率息。」
朋友：「係咩？反而減咗息？」
筆者：「係呀！H+1.7厘減到H+1.6厘，冇睇新聞咩？」
朋友：「冇留意喎，有報導咩？唔見有人Share。」
筆者：「有，早幾日有一段仔，俾條Link你睇。」
朋友：「嘩！劈價新聞一大籮，減息就得幾行，唔怪得。」

有趣！不知外國也是否如此，樓市去年升，所有壞消息當睇唔到，日日報導破頂新聞；今年跌市，所有好消息當冇到，日日報導劈價新聞。

就似各大銀行減按息呢單新聞，本來係一單幾重要的新聞。根據往年的經驗，樓市走勢與銀行取態，收水定放水，關係甚為密切，這則消息可視為一個利好消息，不過報導的篇幅非常少，完全被個別劈價成交的新聞淹蓋。朋友工作忙，睇唔到都好正常。

美國拖慢加息步伐

其實最近開始有正面消息，美國之前預期今年會加息四次，最近已經放風話應該只會加兩次，甚至有分析員認為遲啲可能再修正，有機會唔加。加上銀行著手減H按按息，之前一直纏擾的加息因素暫時得到舒緩。

很多報導說，新盤供應多，大劈價，拖冧二手市場。事實上，睇返最近新盤戰況，又唔覺有大劈價。好似元朗戰線，世宙呎價接近12,000元，朗屏8號輕微低幾個巴仙，映御又再平幾個巴仙，純粹反映地段上的分別，冇乜驚喜，市場都有承接。

返到市區戰線，最近何文田站幾個新盤，包括天鑄二期、ONE HOMANTIN等銷情都唔錯，呎價大約是27,000及18,000元，比去年區內新盤開價確實平少少，但又唔算係大劈價，幾千萬元入場的單位眨吓眼就賣晒。

又有很多報導說，大陸經濟差，香港肯定差，一定會大冧。事實上，睇番最近大陸市場，仲嚇死人。為了刺激經濟及樓市去庫存，大陸推出一系列政策，包括讓銀行透過折扣調低按息，放寬貸款限制，提高貸款成數，首套房首期下調至兩成，第二套房下調至三成等。

內地樓市大收旺場

全國各大城市大收旺場，一線城市尤其是上海、深圳升幅更加驚人，如果說香港的樓價「堅離地」，深圳的樓價恐怕已經穿越大氣層。

其他二線城市戰況亦甚為精彩，過去幾個月筆者與投資兵團戰友買入的幾個珠海新盤，代理微訊咗啲相畀我，售樓部人頭湧湧，好似去搶咁，好在我哋幾個月前早著先機，依家樓價已經調升咗一成有多。唔係話經濟下行會打擊樓市咩？點解冇人話大陸樓會跌三成、五成呢？

去年樓價高企，筆者呼籲不要太亢奮，尤其高溢價的細價樓。今年樓價回落，筆者亦不會太悲觀，香港經濟基礎始終穩健。

反而最大問題是，香港政府只係識講經濟下行，但係施政報告、財政預算等都冇明確的刺激經濟措施，政客、議員更加冇期望，除咗派錢、拉布，有邊個提出過有建設性的刺激經濟方案？領導階層缺乏遠見，才是最令筆者擔憂、失望的事。