沒有炒家 樓價只會更貴（上）

前輩：「梗係啦！炒家貨好多時平過用家貨！」
筆者：「好多朋友以為炒家會賺盡，不如你分享一下。」
前輩：「其實用家先至會賺盡。炒家貨多，呢單賺少啲有乜所謂？做多兩單咪一樣。」
筆者：「咁你啲貨呢？」
前輩：「我賺埋錢，賣出街，都仲平過隔離。」
筆者：「最緊要貨如輪轉。」
前輩：「次次賺到盡，邊個敢接你啲貨，聽見你個名就走啦！」
筆者：「咁用家呢？」
前輩：「用家得一件貨，冇下單，自然想賺盡。」
筆者：「咁又係，反正佢哋住係度，價錢唔靚咪住多陣。」
前輩：「都唔知係咪政府想轉移視線……」

今年書展筆者推出兩本新書，包括講住宅的《50萬上車！細價樓投資致勝法》及講工商舖的《工商舖！小本投資入門》。當中訪問了好幾位資深投資者，包括舖王黎永滔先生，神奇小子黃海明先生，全能投資者康福照先生等等，筆者亦獲益良多。

受制於政府政策，近年很多資深投資者都沒有以前那麼活躍了。沒有炒家參與，政府、市民一廂情願以為樓價會跌，誰不知樓價升得更狠。

炒家只賺差價 不求創新高

前輩提到的情況，就是當年老媽的寫照，永遠覺得自己的單位與別不同，可以比人賣貴一、兩成，最後當然賣不到，繼續住舊屋。

筆者沒有勉強，10年前上車，買入與家人自住的舊居，筆者就當作祖屋，一輩子不賣就是了。不過這10年間，筆者加按了幾次，每次都幫我買入更多物業，也不錯呢。

其實這種心態不太適合投資，幾個月前筆者睇了一個單位，市價360萬元左右，業主堅持380萬元，大半年後，終於賣到380萬元了，賬面上賺多了20萬元，然而卻損失了機會成本，同期周邊的樓價都上漲了，賣樓之後想再買，發現想買的單位升了40萬至50萬元，係咪真係賺咗呢？

剛才說的是「賣出」的情況，現在再說說「買入」的情況。炒家買樓，為的是賺錢，唔夠平、冇水位，就唔會買。

貨源短缺 買家投降

世界是不公平的，炒家有相熟的經紀網絡，熟悉行情，買賣技巧高，比用家買平10%至20%是正常的事。炒家賺錢，絕對不是炒高個市，而是低於市價買入，化妝整容一番，再以略高於市價賣出，就賺中間差價。所以有炒家在，總有很多低價成交，唔平？又點買？

用家就慘啦：「自己住嘛，最緊要鍾意，貴少少冇所謂啦！」業主一句「我唔趕」，企硬唔減，買家一句「冇所謂」，就俾多10萬、20萬元。

不難發現，最近市場在買賣角力下，投降的多數是買家，即使股災出現，仍然有不少地區的樓價屢創新高，再加上政府政策扭曲令市場供應大跌，火上加油，想唔死都幾難！

炒家要賺錢，能夠買平幾多，賺的都是自己，唔通同你創新高咩？不如睇多場英超。

新書中還有很多資深投資者的智慧，歡迎閱讀賜教。