樓奴的誤解

筆者：「冇呀，你知我夜晚多數有講座及課堂，好睇嗎？」
朋友：「幾好丫，幾清新，幾寫實，睇得爭產多，輕鬆吓！」
筆者：「好似好有共鳴咁喎。」
朋友：「個個年青人都話夢想買樓，其實買咗樓惡夢先開始！」
筆者：「點解咁講呢？主角教你架？」
朋友：「係呀，套戲講男主角辛辛苦苦儲錢買樓、供樓，係就係上到車，不過最後俾女朋友飛咗！」
筆者：「點解呢？」
朋友：「為咗買樓、供樓，節衣縮食，好似第一集咁，講佢女朋友生日，想食好啲，買份好啲嘅禮物都唔捨得！」
筆者：「咁唔一定要洗好多錢先開心嘅。」
朋友：「就好似我而家咁，人工得20,000幾元，上次你同我計，如果平平哋買個上車盤，最少都要供萬幾元，一出糧冇咗一半！」

筆者：「開頭幾年又真係辛苦啲……」
朋友：「供30年呀！諗起嚟緊30年都係咁，人都癲！」
筆者：「呢啲就係所謂樓奴？條數唔係咁計！」

不會供足30年

樓奴，顧名思義，「樓的奴隸」。正如朋友所說，很多年青人覺得儲錢買樓已經好辛苦，買到樓之後才是惡夢的開始，每個月一出糧，就花了一半去供樓，想食好啲、著好啲、買好啲都唔捨得，這種生活要過30年，還不是樓奴？

筆者是過來人，可以跟你說，這條數計錯了！首先，你會不會供30年？

筆者認識不少資深炒家，正如他們所說，如果沒有額外印花稅(SSD)，30年流流長早就走了40、50轉。即使現在有SSD，最少要守三年，30年都足夠走10轉。

作為一個上車盤，你不會打算跟它做人世，過幾年樓價升了，賺了錢，就會放售，然後換大啲，或者買多間。

供樓愈來愈輕鬆

事實上，年青人上車最初幾年會比較辛苦，然而，幾年過後就會愈來愈輕鬆。除非期間加息比通脹還要快，否則你會發現，衣食住行各樣消費都不斷上升，普遍薪酬亦會跟隨通脹而上漲，然而，如果沒有加息，供樓還是供那筆數，比例愈來愈細。

第三，你是會進步的。這是最重要，但是又最多年青人忽視的一環。正如朋友所說，今天月入20,000多元，供樓萬多元，每個月一出糧就花了一半供樓，然而，幾年後，你就發現隨着工作經驗的累積，工作能力的提升，收入會愈來愈多。

假設沒有加息，當你收入30,000多元，供款只佔三分之一，當你收入40,000多元，供款就只有四分之一，供款佔入息比例愈來愈少。

最後，你的物業是會升值的。如果你揀得對，長遠來說，你的物業會帶給你無限收獲。

例如幾年後賣出，你手上的首期連利潤，隨時超過100萬元，到時你有權選擇換大屋，又或者買多一層樓收租，你的資產會不斷膨脹，一層樓、兩層樓……到時候你就有更多方法應對。所謂樓奴，其實只是虛構出來的怪物，是年青人不懂計數而已。