想趁跌市買筍盤 4個測試睇你Ready買樓未 | 經一專欄 |香港樓市2019

撰文：1%Anthony  ｜ 圖片：新傳媒資料室、unsplash

朋友： 有筍盤話我知丫，我首期準備好架啦！

筆者： 好呀，糧單、稅單、月結單攞嚟睇吓~~

朋友： 冇喎！我自僱架嘛，邊有呢啲~~

筆者： 冇點借按揭呀？你唔係Full Pay吓話？

測試一：未準備好入息資料

最常見的情況…打工都好啲，工司有齊所有你需要的資料，即使唔見咗都可以搵會計部、人事部攞番。自僱人士就麻煩了，很多時候收入都唔穩定，而且報稅時都扣得就扣，甚至報蝕錢，唔使交稅。以為好爽，到你做按揭的時候就麻煩了。例如自僱人士，要定期將收入存入戶口，保存好銀行紀錄，仲要報稅、交MPF，如果發覺唔夠計，未必過到壓力測試。那就要先找親戚朋友，萬一到時過唔到就要加付首期，有冇人撐你先？搞得嚟又幾個月了！

筆者： 你係咪首置？

朋友： 係…我都未買過樓！

筆者： 你而家住緊嗰度呢？

朋友： 係喎！當年老豆好似加咗我哋幾姐妹名！

筆者： 噢！咁要甩名喎~~

測試二：原來好多人都唔知自己有樓！

上一代家庭觀念重，很多時買樓都會加埋另一半名，甚至加埋仔女名，做埋長命契。

萬一有咩冬瓜豆腐，層樓就會自動轉咗俾仔女，免卻遺產承辦的麻煩。

然而今時今日，這份心意就變成伏！層樓加咗名，即是持有住宅物業，即是唔係首置，買樓就要俾15% 勁辣印花稅。

朋友還好，那是私樓，可以隨時透過買賣甩名。

最慘是當年買居屋的時候，業主一欄填晒幾個屋企人名，今日想甩都唔係咁容易，白白浪費了幾個珍貴的買樓名額。

朋友： 最近有冇筍盤呀？

筆者： 有呀！啱啱收到一間，啱你Budget！

朋友： 咩嚟架？

筆者： 市區一房半新樓，5百幾萬，租1.6萬~~

朋友： 幾好喎，幾時有得睇？

筆者： 係就而家行啦，呢件貨應該過唔週末。

朋友： 咁急？出年仲會唔會再跌呀？

測試三：心理未準備好

如果你仍然都問自己…出年會唔會跌呀？明顯…問得呢個問題，代表你心入理仍未準備好。筍盤一閃即逝，莫講話唔過週末，甚至乎唔過夜，如果到而家都擔心今年樓市會唔會再跌，即是十五、十六，唔可以即時做決定，就算勉強買咗都只會瞓唔啫覺，不如調整好心態先，話俾自己知即使明年再跌多少少，有人買平你幾十萬，但最少你都已經比高位買入的人買平咗近百萬，都算唔錯啦，然後當機會出現的時候就勇於出票試價，買咗就唔好後悔。

筆者： 你心目中諗住邊個地區？

朋友： 冇乜心水，邊度升值潛力高？

筆者： 大西北啦，跌得夠勁。

朋友： 好少去嗰邊，有啲擔心，好似防守力唔夠！

筆者： 東九啦，租務穩陣。

朋友： 老婆唔係咁鍾意嗰邊，好似跌得唔夠勁！

筆者： 不如你自己周圍睇吓先，再話我知…

測試四：揀定地區未？

跌得勁就唔會防守力夠，防守力夠就唔會跌得勁啦！咪玩啦！全港咁大，揀定未先？正如之前所講，筍盤唔等人，要快做決定，如果仍然三心兩意，呢度又話遠，嗰度又話唔鍾意，呢度又話防守力唔夠，嗰度又話跌得唔夠勁，咁點爭？不如真係自己抽啲時間周圍睇吓，揀定幾個地區重點出擊啦！如果決定唔到，不如就由自己住的地方，又或者工作的地方開始先，最少你熟悉，隨時都可以睇到樓嘛。