東涌地流標事件唔會再現 發展商齊投地交功課︳凍鏈茶專欄

早年會德豐放棄入標

呢幅係最近未來東涌東站（預計2029年建成）嗰塊地，期貨來講，地理位置都唔算太差。當時不但個市唔好，條款仲幾辣，包括發展商需要支付一筆11億港元嘅前期費用，俾港鐵向政府補地價。此外，發展商要負責興建商場，建成之後就要交還俾港鐵。當時會德豐地産主席梁志堅（堅叔）表示曾考慮就項目獨資入標，但係計前期費用連同興建商場等成本之後，每呎成本大約$4000港元，最後放棄入標。

唔單止係口號嘅呼籲

早前夏寶龍南下訪港見工商界，呼籲工商界支持政府規劃，當中包括北部都會區同埋交椅洲人工島，當時傳出嚟嘅中央指示就係「倚港興業，以港為家，並要有社會責任多貢獻。」唔單止係口號嘅呼籲，有與會者透露有更多具體指示，包括要求發展商喺政府造地階段參與顧問研究，投標時籌集資源等等。

港鐵就打鐵趁熱

港鐵就打鐵趁熱，今年中港鐵舉行周年大會時，原本表示東涌東站第1期項目將會於未來12個月內重推，而喺夏寶龍訪港之後，即時將項目推出，截標日仲要快到喺下個月18日。港鐵為咗確保塊地賣得出，都做咗少少功夫，主要係將項目「拆細」，而發展商需要支付嘅前期費用，就由11億港元減至約3.3億港元。

相信今次就100％唔會流標，上星期港鐵一共收到33份意向書，當中長實（1113.HK)、恒地(0012.HK)、新地(0016.HK)及華懋等都有遞交意向書，最後邊個偷雞唔入標，必定遭人口實。不過，入標啫，又無規定要用幾錢去投地、又無規定合資定獨資。發展商可以低價入標執死雞，又或者幾個發展商大家夾一份，「意思、意思」架咋﹗