月入18,000元 租樓、養貓後每月只剩3,000蚊 會否太冒險？網民齊獻計
撰文：經一編輯部 ｜圖片：Unsplash
樓主：月入18K搬唔搬到出去住？
日前，有打工仔在連登討論區以「其實搵18K搬唔搬到出去住？」為題發文，詢問網民對於租樓的意見。樓主表示自己與家人關係不好，想搬出去住，現時月入18K兼有9萬元儲蓄，減去租樓、養貓日常生活開支後，每月將會剩下3,000元，未知「每個月得返3k會唔會太掹掹緊」。
「有架公司車代步，油錢都唔使畀。睇過如果住2房村屋唔太殘、有乾濕分離都要8.5K，租埋車位要9.5K。計埋水電煤當10K，一個月得返8000元。平時有計自己用幾錢，早晚食屋企連埋保險使5,000元一個月，即係淨返3,000元。銀行戶口有90K，唔使買樓，搬唔搬好？」
月入18K租樓要會月月清、生活要「死慳死抵」？
帖文一出，引起網民熱議。有人留言支持樓主搬出去自己租樓的決定，惟要做好心理準備，租樓的生活會好辛苦，有時候更要「死慳死抵」。
- 「相處唔到嘅話，負擔唔重，又計得掂條數，搬出嚟係好事嚟。當你無你先會諗點搵多啲，一直住係屋企，家人又覺得益咗你好多，自己又覺得處處受限條氣唔順，個人會愈嚟愈頹。」
- 「如果真係好想搬出嚟嘅，死慳死抵都勉強夠，但預咗買少少嘢都要計住就住。」
- 「住到，不過你會月月清。」
- 「夠使咪得，大把劏房家庭月入又少又貴租又無拎援助都生存到。你自己想慳啲使搬出去，定唔想太緊張財政但無得搬？只有你自己衡量到。」
- 「無話唔得嘅，清貧啲簡單啲都可以。」
網民：應合租節省開支
又有網民勸樓主可考慮與人合租，減輕負擔。
- 「搬，計唔掂條數試下搵人夾。利申：夾緊租村屋，一人一房，共享大廳，每人約4,000元。」
- 「夾會抵啲， 你2房2個人夾，就變咗多5,000蚊出嚟使喇！」
「我同你收入支出都差唔多，仲有3隻貓。搬咗出去年幾，未死得，不過係同人夾租。平時自己煮飯同帶飯多，日用品藥房買就最慳。我都唔算大使，夾租都差不多月月清，儲到都得好少，要一個人住嘅話應該好辛苦。」
得返3,000元搵難維持日常生活兼儲錢？
雖然有網民支持樓主，但有人卻認為他應該「諗清楚」，若依照現時的收入，租樓後剩下3,000元，不但難維持日常生活，更遑論儲錢。
「你永遠儲唔夠錢，家務自己做，日用品買到甩甩漏漏要成日落去再買，半年後望住啲同輩慢慢儲錢到做到自己想做嘅嘢，投資買車玩錶仲foresee到幾年後畀首期，開始拋離你，而你喺同一個moment，仲煩緊點死慳死抵去交租。」
- 「3,000蚊即係1日100蚊，你仲要買埋日用品？」
- 「公司車同包油錢呢個福利，係咪之後一定唔會取消先？甚至你係咪一定唔會無咗呢份工先？一無咗份工，仲有成年租約就出事。」
- 「食都唔夠喇仲話買嘢，每日得100蚊食嘢？」
- 「你仲要養貓，月月清到時候隻貓有咩事閒閒哋都幾千蚊！」
- 「得返3,000蚊真係諗清楚先，特別係村屋，村陀地收錢，你仲有大把錢要畀。」
- 「如果無投資開，就變月月清，諗清楚先！」
「你租樓要畀兩按一上（2個月租金及1個月租金）同埋要簽一年約，仲有你間屋包唔包裝修傢俬？咁又會多一筆錢。新居入伙又會買多咗啲日用品，你睇你90K本夠唔夠頂到半年或更多？」
網民：月入18K租樓「太大諗頭」
又有網民直言樓主此刻的想法「太大諗頭」，建議他應該等到收入至少有25K的時候才考慮租屋，亦有網民指出租金不應該多過人工的三分之一，起碼要預留應急錢以備不時之需。
- 「早晚食屋企，搬咗咪又係早晚返屋企。」
- 「緊係唔搬啦！一失業，你就gg！」
- 「18K搬劏房都難啦！有25K先再諗！」
- 「唔買樓都至少有1年至1年半儲蓄喇！一陣又整多個肺炎， 份工無埋都仲頂到一陣！」
「廁紙沐浴露洗頭水都唔係用好多，幾個月至半年一支或一條，你咪去HKTVMALL執下睇下大約幾錢，日用品1個月當200蚊，當早餐10蚊，晚餐買個飯都50蚊，1日得返33蚊未計貓糧貓砂，同埋你養貓你唔使諗佢醫藥費咩？我諗25K先搬出嚟會好啲 唔係你就要用你儲嘅90K喇！」
- 「18K月入加上90K儲蓄，用9.5K去租樓同車位真係太吃力。租金方面budget一係再減一減啦！同埋我覺得最好有20萬cash傍身先再考慮搬比較好。」
- 「唔好使到咁盡安全啲，一陣突然加租就玩完。」
「認真答，租金建議唔好多過人工三分一，無原因都可以儲定錢應急。搬出去就唔好預返屋企，屋企人真係咁難頂嘅話辛苦啲靠自己啦！講到屋企咁難頂仲諗住早晚食屋企？計掂數先啦你！」
留錢傍身好過租樓？
不過，有網民坦言租樓等於幫人供樓，反對租屋，認為應留錢傍身。又有人因應樓主的現況，計算樓主搬出去住每年使費達12萬，5年累計60萬，認為他應三思。
- 「調返轉諗，搬出嚟一年要使多12萬，5年已經60萬。如果堅忍到，畀我就唔搬出嚟！而且一闊三大，一有自己私人空間就多咗好多嗜好興趣，使錢機會會多咗。況且水電煤每月500蚊，好難，除非你夏天唔開冷氣。」
- 「30K我都無諗過搬出去，因為如果筆租金用去買VOO，嗰度舊錢都好恐怖！你諗你啦，我就話18K搬出去=END OF LIFE。」
- 「你租一個月樓就係幫人供一個月樓，錢幾時都係袋喺身好，你唔知幾時真係要用錢，不如屈就下好過！」
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
