日出康城新盤Malibu 呎價近萬五 抵唔抵買
代理： 「今次呢個價真係超筍呀，肯定賺大錢！」
朋友： 「平均呎價接近1.5萬喎，有幾筍呀？」
代理： 「最近同系的Monterey呎價2.6萬創新高…」
朋友： 「嗰度係將軍澳喎，而且仲係4房大戶貨尾招標。」
筆者： 「貨尾、樓王，仲要招標，價錢係會偏高嘅。」
代理： 「講日出康城，唔計特色單位，晉海呎價近2萬啦！」
朋友： 「都算係貨尾丫。」
代理： 「唔睇最近嗰批，之前都賣到1.7、1.8萬啦。」
朋友： 「咁又真係幾顛嘅。」
代理： 「所以你話係咪即買即賺丫。」
朋友： 「但係…附近半新盤都係1.1、1.2萬咋喎！」
代理： 「嗰啲邊有得比丫…」
撰文：1%Anthony
日出康城Malibu位置：地區、地段
先講地區…將軍澳與日出康城雖然只是一站之隔，但發展步伐明顯有別。過去將軍澳被視為供應重鎮，經過逾20年發展，可賣的新樓都賣得七七八八，生活配套漸見完善，樓價、租金開始追上。
至於日出康城，供應陸續有來，大型商場、民生街舖欠奉，生活配套有待改善，還有環境及空氣質素等，亦需要時間提升。
再講地段…如果同樣都是日出康城，與附近其他樓盤相比，Malibu位置上確實有優勢，除了位於康城站上蓋，最重要是鄰近7期發展項目，將來那裡會有一個48萬呎大型商場，區內算靚位。不過要等到整個社區發展成熟，看將軍澳就知道，不是短時間！
日出康城Malibu單位：間格、景觀
景觀方面…代理說前排望海，前面還有多個球場，非常開揚。但睇番各路傳媒報導，前面還會起樓，尤其是海旁的巴士總站，落成後亦會起樓，海景或會受阻，或者都係揀內園穩陣。
間格方面…單位開則多元化，有一房單位，Lump Sum比較細。3房有分3房、3房１套、3房1套連儲物室，有甚麼分別呢？細心睇原來房單位沒有工人房，如果需要請工人，就要去到3房1套連儲物室了，示範單位所見，儲物室內有冷氣，也在廚房內。
2房又分2房、2房開放式廚房、2房連儲物室、2房開放式廚房連儲物室，比較少見，小家庭都可以有地方請工人，哈哈！
日出康城Malibu配套：會所、起居
先講會所…正！當中有幾個亮點…健身室是24小時的，泳池有室內有室外，項目模式顯示，室外泳池部份標示着無邊際泳池，咁有渡假風情？另有幾個宴會廳，附設燒烤區及按摩池。還有甚少見的全場籃球場，大部份會所都是得半場，亦可轉為3個羽毛球場。
當然還有很多其他基本設施如娛樂室、影音室、音樂室、兒童天地、休閒閱讀區等，合共5.6萬呎，值得一讚。
至於起居生活…主要靠未來落成的商場，交通除了地鐵，還有即將興建的跨灣大橋，可以直出將軍澳、啟德及九龍其他地方，將來可以避開將軍澳的路段，不過是將來的事，要等很多年啊！
日出康城Malibu價錢：呎價、總價、Terms
先講總價…項目有一房單位，首批僅368呎，折會總價536萬至589萬，都在600萬按揭保險門檻之內，可以做高成數按揭，相信會非常搶手。不過代理說，抽中機會很微，因為發展商或會安排大手客優先，要有心理準備。2房由682萬起，3房單位827萬起， 3房1套連儲物室就由1,100萬起。
再講Terms…今次付款方法確實有點失望，睇新樓當然期望有高成數按揭，例如之前的新盤，高達85%，甚至有包借。可惜今次只有相當於樓價20%的二按，一按加二按不超過樓價的70%！項目關鍵日期是2020年5月31日，即供要白供兩年多，如果選擇建築期，折扣少6%！唔抵喎！最抵似乎是180天及360天。
最後講呎價…項目平均呎價是14,347元，相比晉海確實有折讓，但相比日出康城其他半新樓，呎價大約1.15萬到1.2萬，高出不少。而最大的考慮反而是，將軍澳市中心的二手新式屋苑，例如將軍澳中心、君傲灣等，呎價都是1.5萬左右，雖然是十多年樓，但位置上最少是將軍澳，也可以即買即住即收租，你會點揀？
延伸閱讀:
去旅行訂酒店，請按此，睇睇有乜優惠
新居屋最平8萬入場 白表單身瞓身一博
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
