畀你揀住新界村屋定市區樓？有人話「住過村屋返唔到轉頭」、「年紀大一定揀市區」
撰文：經一編輯部｜圖片：Unsplash、AM730、親子王國討論區
樓主：鐘意住市區樓定新界村屋？
近日，有人於親子王國討論區以「鐘意住市區樓定新界村屋？」為題發文，指村屋及市區樓各有優缺點，想知道網民對鍾情哪一類樓盤。
市區樓交通方便 具備生活所需
帖文一出，引起網民熱烈回應。有人力撐市區樓，直言交通方便最重要。
- 「有錢梗係揀市區，睇過有啲村屋要自己拎垃圾去垃圾站，隔音用料麻麻，錦上路嗰邊勁多印巴人，路又爛又難行，除非屋苑式管理嗰啲村屋又唔同。」
- 「市區樓，只鍾意徒步10分鐘內有齊餐廳、超市、街市、港鐵站嗰種。」
- 「都係市區好，返工返學，買嘢方便，我行去地鐵站唔使2分鐘。」
- 「細個住新界村屋十幾年，交通唔方便、買嘢唔方便，環境唔見得好，我一啲都唔鐘意住村屋。」
- 「一定住市區，方便好重要，同埋我鍾意行街shopping。郊區就放假先鍾意行落山ok，住就唔好了，驚多蟲。」
- 「年紀大，一定市區，有齊生活所需，身體不適，一伸手，就可以坐的士去醫院，這個很重要。」
「鍾意住市區多啲。未嫁前住村屋，雖然行出去5至7分鐘就有巴士/小巴/食店/雜貨店。嫁咗後住市區市中心，落街乜都有，交通、食店、超市、街市、商場等等，全部步行就去到，唔使搭車勁方便。始終住市區市中心勁方便乜都有，就算去完夜街返家都無咁驚，如果講唔好，係空氣差啲。如果講住村屋有乜好，係空氣好和可以bbq。」
「我一出世已經住新界村屋，自細已體會到交通不方便嘅煩惱，即使屋大，環境清幽都彌補唔到佢嘅缺點，到大個有能力搬出去住，首要條件就係交通方便，一定要住地鐵站附近。」
網民：一定揀市區樓 我驚蛇蟲鼠蟻
有網民直言即使村屋遠離煩囂，但礙於太多昆蟲，又擔心安全問題，最終仍會選擇市區樓。
- 「住咗幾廿年市區，從無考慮住村屋。我驚蛇蟲鼠蟻，又怕搭好耐車。」
- 「我好想有大天台，但蛇蟲鼠蟻我真係驚。」
- 「好想住村屋養大狗，但勁驚昆蟲。」
- 「前排睇過康樂園，獨立屋，單邊，大花園，好靚。多口問咗句屋主有冇見過蛇，佢話有不過好細條啫，即刻考慮番市區樓！」
- 「我朋友住西貢村屋，有三個囡，唔放心老婆佢哋，要成日自己車出、車入，好忙。佢住咗2年，都係搬返市區。」
- 「我驚鬼！」
「唔鍾意村屋，成日覺得會有小偷輕易入屋，無安全感，又多蛇蟲鼠蟻，好驚。」
「有次去我親戚屋企（西貢），行到屋大門外自動燈一著，個場面好似黑太陽731個恐怖實驗室咁，成個範圍密麻麻全部都係蚊。」
「會揀市區樓；村屋，勝在幾千蚊已經租到4，5百尺單位，空氣好，但交通唔方便，而且夜晚好靜，樓上樓下好應聲，女仔自己一個會唔敢行。丟垃圾要行出去附近大垃圾收集箱。昆蟲就市區樓都有，不過會多飛蛾，甲蟲，蜜蜂個類。」
住過村屋返唔到轉頭？
雖然有網民認為應該選擇市區樓，但部分人卻力撐市區樓，認為村屋地方夠大、空氣好、環境清幽，有人直言「住過村屋返唔到轉頭」。
「我住村屋，5分鐘內有齊哂你講嘅嘢。本身都係住樓，搬入村屋前都驚蛇蟲鼠蟻，但搬咗入去之後，無呢個問題，因為隔離左右啲人都算乾淨，只係有蚊。不過，之前住樓都多蚊，所以無分別。現在有天台有露台，晾衫完全好，得閒仲可以係天台BBQ，現在畀我揀，唔會住返樓。」
「一定係村屋，住過村屋返唔到轉頭，疫情下，唔使搭𨋢已經係一大優點，空氣又好，感覺舒服，一行出門附近已經有一大片田，又可以種花種菜、BBQ，未住過村屋唔會明白的！」
- 「以前一直住港島，亦都對新界好抗拒，因為超級遠唔方便。但而家住落咗，再揀我都會揀新界，住落真係唔想出市區。」
- 「市區都有村屋，我住荃灣村屋，步行唔使7分鐘到荃灣地鐵站，附近有公共游泳池，唔一定要大西北區，唯一嘅係比較舊30年樓，買完要大執。」
- 「我都係呢10幾年先改住村屋，係有管理嗰啲，我覺得好好住呀，又乾淨，空氣好，地方大，架車泊喺大閘外，同一般屋苑管理一樣，但搭港鐵後要轉8分鐘車。不過，好多市區屋苑都唔係近港鐡啦，所以我好鍾意。」
- 「其實香港有幾大？交通又方便，你看看沙田、大埔，有咁多，村屋，一啲都無咩問題，離島就…」
網民：住村屋環境清幽、有靚景
又有網民指，住村屋可以親近大自然兼享受美麗的風景。
- 「對住個海，睇到日出好靚嘅風景！」
- 「住咗兩個月村屋，係多蚊，琴晚見到螢火蟲，出入有小巴，巴士，十幾分鐘到上水，有時揸車，行出對面見到有羊食草，有大自然感覺，可以行山，試過行去河上鄉，都好住呀！我已退休。」
- 「當每天都對住人煙稠密或飛車聲，有個清幽居住環境來平衡生活好重要。有天台更加正，可以抖下氣，放鬆心情。」
唔使返工返學一定揀村屋？
雖然村屋、市區樓各有支持者，有網民認為兩者有優點亦有缺點，指如果要返工可考慮市區樓，因交通方便，但如果已經退休，住村屋未嘗不是一個好選擇。
- 「要返工要返學梗係市區樓。幾細幾舊都好過遠啊，日後舟車勞頓好玩咩。退咗休就住邊無所謂，反正有的是時間。」
- 「有小朋友，退休會揀近鐵路村屋，喺天台bbq種菜單車，冇煩囂好舒服 ！全家返工會揀市區 ！」
- 「要返工住市區，第日退休想住村屋。」
免責聲明：本專頁刊載的所有投資分析技巧，只可作參考用途。市場瞬息萬變，讀者在作出投資決定前理應審慎，並主動掌握市場最新狀況。若不幸招致任何損失，概與本刊及相關作者無關。而本集團旗下網站或社交平台的網誌內容及觀點，僅屬筆者個人意見，與新傳媒立場無關。本集團旗下網站對因上述人士張貼之資訊內容所帶來之損失或損害概不負責。
太古城上月最新放盤叫價是多少？
太古城上月最新放盤叫價大約…各區樓市買賣詳情請看。
九龍區有哪些大型屋苑放盤呎價最低？
九龍區不少受歡迎的大型屋苑呎價對比上月都有回落…各區樓市買賣詳情請看。
